TURA: Ia 2023 bilsioba National People’s Party (NPP) sorkariko riktaina siengani gimin, re·baenggipa February-ni 27 tariko ong·atenggipa Meghalaya Legislative Assembly election-o gipin dolni candidate-rangna pu·onede maming namgni dongjawa ine Sombar salo, a·dokni Chief Minister aro NPP-ni national president Conrad K Sangma parakataha.
Sombar salo, NPP-ni national president, Selsella constituency-ni ning·o donggipa Narangbari songo NPP-ni candidate, Arbinstone Marak-na campaign ka·engmiting somoio ia kattarangko aganaha.
2008 bilsio ua an·tangba Selsella constituency-on susaahachim aro uandaken Selsella constituency-ara una namen dingtangmanchagipa constituency ong·a ineba ia tom·bimonganio Sangma aganaha.
“Selsella-ni manderangsa angna politics-ni gimin skie on·aha aro anga an·tangba politics-ni gimin ia biapon bang·en skie ra·aha,” ine Sangma aganaha.
NPP-ni candidate Arbinstone Marak-ara Selsella jolni depantean ong·a ineba ia election-o uko seokchina gita Selsella constituency-ni manderangko didiangaha.
“Ua an·tangan Selsella-oni ong·e, jolni nanganirangko namen ma·sigipa ong·a aro ua seokako man·genchimode manderangni ku·rangko on·chongmotgen,” ine NPP-ni national president parakataha.
Sangma-ni parakatani gitade, Selsella-ni manderangsa ia election-o Arbinstone Marak-na NPP-ni tikitko on·china diditokahani gimin NPP-ni dilgiparang ia election-o, gitcham MLA-na on·gija Arbinstone Marak-na on·skaaha.
NPP dolan gital sorkariko riktaina siengani gimin ia election-o gipin dolrangna pu·onede namgni dongjawa ine janapatengon, “Ia sal somoirango Meghalaya a·dokni politics namen dingtangaha. Khasi aro Jaintia Hills a·jarangoba manderang NPP-ko bilakbatatna gita ku·cholsan ong·tokahani gimin chinga bang·bata seat-rangkon chena ka·dongenga,” ine Sangma parakataha.
