TURA: North Tura constituency-ni mitam biaprango gitcham MLA-ni kamna kusi ong·aniko paraktokahaoba bang·a manderangan, maming namgnirangko man·jaha ine dingtanganiko nikna ka·oksianiko paraktokaha.
North Tura constituency-o National People’s Party (NPP)-ni Thomas A Sangma, MLA ong·e kamko ka·engachim indiba constituency-ni mitam biaprangode uni ning·o maming namgnirangko nikna man·jaha ine manderang suk ong·gijaniko parakskaaha.
Rongram Gorkha UP School-ni headmaster Nawaraj Thapa-ni ia kobor ra·timgipana aganani gitade, uamangni nanganirangko da·o ong·enggipa North Tura-ni MLA pangnan chu·sokate on·rongachim indiba NPP-chi dilgipa sorkarini ning·o skigiparangna maming dakchakanirangko on·jahani gimin ia chango MDA sorkarina ka·dongchakani dongjaengaha.
“Chingni MLA-ni kamo anga an·tangde kusi ong·aiachim indiba NPP-chi dilgipa MDA sorkarinade anga ka·dongna man·jawaha. 2018 bilsini election-na skangde Adhoc skigiparangnaba chu·gimik dormahako bariatna ku·rachakahachim indiba dormahako 23 percent-san bariataiaha,” ine bilsi 52 ong·gipa Thapa aganaha.
Manderangni nangnikani gitade ia sorkari, scheme-rangko chu·sokate on·jaha ineba ua suk ong·gijaniko parakataha.
Apsan daken, Rongram-ni me·chikma saksaba gitcham sorkarirangni kamna suk ong·gijaniko parakataha.
“Election-na skangde chinga Congress aro NPP dolrangni ku·rachakanirangko bang·en knarongachim indiba ia sorkarirang chingni ka·dongsoani gita kamrangko chu·sokate on·jaha,” ine ua me·chik aganaha.
Indake ong·engon, Rongkhon-oni bilsi 65 ong·gipa Manel Marak-ba batanggimin bilsi bongana sorkariko chalaianio kamrangko name ka·na man·jaha ine parakataha.
“Bilsi bongana sorkariko chalaianio anga an·tangde bang·e dingtanganiko nikna man·jaha. Toe aganna gita, chingni gittimo da·alonan Jal Jeevan Mission (JJM)-ni maming namgnirangko man·kujaenga aro chingni je man·paenggipa chirangnaba chinga tangkarangko gamna nangenga,” ine Marak parakataha.
North Tura constituency-ni ning·o songdongenggipa mitam manderang, joltangtango network-rangko name man·jaengani giminba suk ong·gijaniko parakattokaha.
Ia chang Assembly election-o NPP-ni candidate aro North Tura-ni MLA Thomas Sangma baksa BJP-ni Adamkid Sangma, Congress-ni Billykid A Sangma aro Trinamool Congress (TMC)-ni Rupert M Sangma susaenga aro manderangni iandake dingtanganiko nikna ka·oksitokengani gimin an·tangtangni chena ka·dongenganiko parakattokskaaha.
North Tura constituency-o gimik sak 34,232 voter-rang gnang aro gimik dam 46 polling station-rang gnang ine nikna man·a.
