SHILLONG: Re·baenggipa February-ni 27 tariko ong·atna sienggipa Meghalaya Legislative Assembly election-na Bharatiya Janata Party (BJP)-ni manifesto ba chu·sokatna ku·rachakanirangko segatgimin ki·tapko Budbar salo, BJP-ni national president JP Nadda, BJP-ni state president Ernest Mawrie aro gipin dilgiparang baksa oprake on·angaha.
BJP-ni election manifesto-o skanggipa aro mongsonggipa ku·rachakaniara, ia election-o chee sorkariko rikna man·genchimode a·doko 7th Pay Commission-ko ra·gatanian ong·enga.
Ia election manifesto-o BJP-ni ku·rachakenggipa gipin mongsonggipa kamrangara, PM-Kisan Samman Nidhi Yojana-ko gong 2000-chi bariatani, me·chik bi·sana atchiani somoio gong 50,000-ni bond-ko on·ani, me·chikrangna Class KG-oni Post Graduate-ona indin lekka porako on·ani, Ujjawala Yojana-ni ning·o bilsiprakon ronggni gas cylinder-ko indin on·ani, chadamberangko mangrakbatatna Special Economic Zones-ko ra·gatna, chadamberangna kam ka·e cha·ani cholrangko on·na gita karkanarangko kulina, a·a donggijagipa game ge·e cha·giparangn bilsio gong 3000-ko aro na·tok rim·e cha·giparangna bilsio gong 6000/- ka·e dakchakaniko on·na, randi aro segri ma·giparangna bilsio gong 24,000-ko dakchake on·na, butchuma budeparangna pension-ko changgni dake on·na aro uandakgipa gipin ku·rachakanirangan ong·achim.
2018 bilsini Assembly election-ode BJP, damgni seat-rangkosan cheaiahachim aro ia changode a·dokni pilak dam 60 constituency-rangon susaskaengachim ine nikna man·a.
