TURA: India a·song gimiko Meghalaya a·dokan tangka paisa jakkalsretbatsranggipa a·dok ong·enga ine Bristibar attamo, Union Home Minister Amit Shah, skanggipa changna Garo Hills-ona re·bae, Assembly election-na Tura-ni Don Bosco Higher Secondary School kal·chakramo BJP candidate-rangna campaign ka·angengmiting somoio parakataha.
Shah-ni Tura-ona re·baanio unbaksa BJP-ni national secretary Rithuraj Sinha, BJP-ni dilgipa aro Assam Assembly-ni Deputy Speaker Numal Momin aro NPP-ni candidate-rang, chong·motan Bernard Marak, Adamkid Sangma, Thomas Marak, Bakul Hajong aro gipinrangba dongpae bak ra·angaha.
Meghalaya a·doko namroro silroroaniko ra·bana gitade, BJP-ko sorkari rikna cholko on·na nangenga ine janapatengon, ia Assembly election-o BJP-ni candidate-rangko seoke chegipa ong·atchina gita Shah didiangaha.
Batanggimin bilsi bongani gisepo Assam a·dokode bang·bea medical college-rangko kulina man·aha indiba Meghalaya a·dokde da·o bilsi 50 gappilani ja·manoba medical college ge·sakon kulina man·kujaenga ineba Shah parakataha.
“Batanggimin bilsi 50-ni gisepo tangka paisa jakkalsretani a·selan Meghalaya a·doko mamingni gitan tang·dona man·jaenga. 2014 bilsioni 2023 bilsiona PM Modi-ni dilanichi a·song gimikon namroro silroroaniko nikna man·aha indiba ia namroro silroroani Meghalaya a·dokonade sokbakujaenga. Meghalaya a·doko BJP-ko bilakgipa dol ong·atbo chinga ia a·doko tangka jakkalsretaniko bon·atgen,” ine Union Home Minister aganaha.
Meghalaya a·doko ‘engine ge·gni’ donggipa BJP sorkariko chalaigenchimode bang·a namroro silroroaniko ra·bana man·gen ineba ua aganaha.
Meghalaya a·doko ma·mong sorkarini ra·gate on·gipa scheme-rangko manderangona sokatjaenga ine matnangatengon, PM Modi-de pilak scheme-rangkon Meghalaya a·dokonaba watatengachim indiba ia biapona sokbaon ia scheme-rang an·tangtang gimaenga ine Shah, a·dok sorkarirangko matnangataha.
A·doko BJP sorkariko rikna man·ode. noksan ong·e chalaienggipa Meghalaya Energy Corporation Limited (MeECL)-koba man·dapani gnang ong·atna man·gen ineba Union Home Minister parakataha.
A·songni pilak a·dokrangon, primary-oni a·bachenge higher education pilakkon ku·siktangchi skie ra·na man·gnok ineba ia tom·anio Shah parakataha.
BJP-ko Tribal-rangni kosako chakatgipa dol ine matnanganiko jegalatengon, India a·songo BJP dolsa, a·songni skanggipa Tribal me·chik Draupadi Murmu-ko a·songni President ong·atchenggipa ong·aha ine Shah parakataha.
India a·songo M’laya a·dokan tangka jakkalsretbatsranggipa: Amit Shah
Date:
Share post: