TURA: Re·anggipa Budbar salo, West Garo Hills Election Branch-ni SVEEP Cell-ni gita Ethical Voting ba nama bewalo dilgipako seokani bidingo Tura Don Bosco College-ni NSS Volunteer-rangna agan-talate on·na gita awareness program-ko Babadam songo ong·atangaha.
Ia program-ko ong·atanio West Garo Hills a·jani Additional Deputy Commissioner (ADC) George Marboh, jinmana aganprakengon, re·baenggipa February-ni 27 tariko ong·atenggipa Meghalaya Assembly election-o nama bewalo dilgipako seokchina NSS Volunteer-rangko didiangaha.
An·tangtangna on·gimin bilko jakkale dilgipako seokanio bak ra·na nangani gimin gipinrangnaba agan-talate on·skachina gitaba ua NSS Volunteer-rangko didiangaha.
Election-ni somoio, gam-jinrangna mikpakma nie aro jat ba torom basee dilgipako seokjachina indiba a·songko dilna kragipa mandekosa seokchina gitaba ia tom·anio ADC didiangaha.
Electronic Voting Machine (EVM) aro Voter Verifiable Paper Audit Trail (VVPAT)-rangko jakkalani bidingo West Garo Hills a·jani Election Branch, NSS Vounteer-rangna dake mesokangskaaha.
Re·baenggipa February 27 tariko ong·atenggipa Assembly election-o poll volunteer dakna gita MSS Volunteer-rangoni bang·batan an·tangtangni biminrangko segatangaha.
