TURA: Re·baenggipa February-ni 27 tariko ong·atenggipa Meghalaya Assembly election-o National People’s Party (NPP), Garo Hills-o seat damsakoba chena man·jawa aro a·dokni chief minister baksana NPP-ni national president ong·enggipa Conrad K Sangma-ba South Tura constituency-o amako man·gen ine Trinamool Congress (TMC) parakataha.
NPP-chi dilgipa a·dok sorkariko tangka jakkalsretgipa sorkari ine matnangatengon, jadokna skangsan uamang TMC-ko ma·sija dakmikachim indiba salantian TMC-ko matnangrongskaachim ine TMC-ni national president Abhishek Banerjee parakataha.
“Uamang (NPP) chingna kenjagokesa salantian chingko matnange aganrongenga. Je obosta ong·genchimoba chinga (TMC) na·simang baksa ong·aigen aro ia tangka jakksretgipa NPP sorkarioniko jakgitel ong·atgen, iako anga na·simangna ku·rachakenga,” ine Banerjee aganaha.
Re·anggipa bilsio Mukroh songo ong·anggipa a·selni gimin janapatengon, ia a·sel ong·aoni da·o jagittam batangpilengaha indiba ua somoio dosgri manderangko gogipa officer-rangni kosako da·onan maming ja·kurangko de·kujaenga ine TMC-ni dilgipa matnangataha.
“Dosgri manderangko iandake goe galengon, dos dakgipa manderangna sastiko on·aniara chief minister-ni daito ong·jama? Iani bidingo ua maming ja·kuko de·na man·jahani gimin an·tangan kamtangko watna nangachim,” ine Banerjee aganaha.
Meghalaya a·doko a·dokni manderangna chakatgipa dilgipakosa nangenga ine janapatengon, NPP-chi dilgipa sorkarikode Delhi aro Guwahati songjinmaonisa chalaiachim ine TMC-ni national general secretary matnangataha.
Tura jillao streetlight-rang teng·jaengani giminba ua a·dokni chief minister aro South Tura-ni MLA ong·enggipa Conrad Sangma-ko matnangataha.
