NPP sorkarini tangka paisa jakkalsretaniko Supreme Court-chi sandirokatna BJP ku·rachaka

TURA: Sukrobar salo, Union Home Minister Amit Shah, West Garo Hills a·jani ning·o donggipa Dalu constituency-ona re·ange manderangna aganprakangaha aro ia tom·anio ua jinmana aganprakangengon, BJP-ko seoke sorkari rikna chol on·genchimode NPP-chi dilgipa sorkarini tangka paisa jakkalsretanirangko Supreme Court-ni gitcham judge-chi sandirokatgen ine ku·rachakaniko on·angaha.
Meghalaya a·doko tangka paisarangko jakkalsretanina gitcham sorkarirangko matnangatengon, Mukul aro Conrad sakgnian Sangma-rang ong·genchimoba a·doko maming tang·doanirangko nikna man·jaha ine Shah parakataha.
“Meghalaya a·doko Sangma-rangan a·dokko sason ka·ahachim indiba maming namroro silroroanirang dongjaha, indide indita bilsirangna uamang maiko dakaha? Ma·mong sorkarini ning·o chame on·atgipa tangka paisarangko kangal cholgrirangona sokatna gita a·dokko tangka paisa jakkalsretaoniko jakgitel ong·atani somoi ong·aha,” ine Union Minister aganaha.
Batanggimin bilsisnina baten BJP-ni ning·o Assam a·dokna bang·en namroro silroroani kamrangko ra·baaha ine janapatengon, Assam-o iandake namroro silroroaniko nikna man·aniara ma·mong sorkarini ra·gate on·enggipa scheme-rangni a·selsa ong·enga ine Shah parakataha.
“Meghalaya a·dokna PM Modi, scheme-rangko watatahachim indiba Sangma sorkarisa iarangko champengaha. Batanggimin bilsirangoba ma·mongoni watatenggipa scheme-ni tangkarang a·dokona sokbaahachim indiba dilgiparangni jakkalsretani a·sel ia tangka paisarang manderangona sokangjaha. Uni gimin Meghalaya a·doko BJP-ko bilona watatgenchimode, chinga skanggipa tangka paisa jakkalsretaniko Supreme Court-ni gitcham judge-chi sandirokatchenggen,” ine Union Home Minister aganaha.
NPP-chi dilgipa sorkariko ‘nosto ong·gimin transformer’ gita toe aganangengon, “Da·o ia gitcham transformer-ko bodole BJP-ko seokani somoi ong·aha. BJP-ko sorkari rikna on·genchimosa scheme-rang manderangona sokbagen. Manderang an·tangtangni man·na nanggipa cha·ani ringanirangko, nokrangko, paikanarangko, indin sanna banana cholrangko aro LPG cylinder-rangko man·gen,” ine Shah ku·rachakaniko on·angaha.
Kamgri ong·e dongenggipa chadamberangna maming dongnuani gri kamrangko on·gen ineba Shah, ia tom·anio ku·rachakaniko on·angaha.
Assam, Manipur aro Tripura a·dokrangode maming dongnuani grian kamrangko on·enga ine janapatengon, “Meghalaya a·doko ku·mitdu du·ani gri sorkari kamrangko man·engama?” ine Union Home Minister sing·doangaha.
Meghalaya a·doko national highway-rangko tarianirang namjaenga ineba ua a·dok sorkarirangko matnange aganangaha.
Dalu constituency-ona re·angna skang ua Garobadha-onaba re·ange dingtang dingtang constituency-ni BJP candidate-rangna campaign ka·angaha.