SHILLONG: Meghalaya a·dokni gitcham home minister HDR Lyngdoh, Sombar salo rang·gitik ka·tongni saaniko man·enba a·gilsakko watangaha.
Koborko on·ani gitade, Sombar salo ua election-na tom·aniko ong·atanio bak ra·engachim indiba rang·gitik saaniko man·enba ua ga·akgopaha.
Ga·akgopani ja·man bakan Lyngdoh-ko hospital-ona ra·angahachim indiba ua hospital-o siangaha.
A·dokni gitcham home minister HDR Lyngdoh, 2018 bilsini Assembly election-o Congress doloni susae amako man·rikahachim aro ia changoba ua United Democratic Party (UDP)-oni Sohiong constituency-o susataiengachim.
Dr Mukul Sangma-chi dilenggipa Congress sorkarini somoio ua a·dokni home minister ong·e dangdike on·angahachim.
1988 bilsini Assembly election-o ua Sohiong constituency-o Hill State People’s Democratic Party (HSPDP)-oni susae seokako man·chengaha aro uandaken joljol 1998 bilsiona Sohiong-ni MLA ong·angahachim.
1998 bilsini Assembly election-o Lyngdoh, UDP-ni candidate RA Lyngdoh-ni jako amako man·rikahachim indiba 1999 bilsio ua Congress tikitchi susae, Sohiong-Nongspung constituency-ni MDC-na seokako man·skaaha.
2003 bilsini Assembly election-o Congress tikitchi Sohiong constituency-onin susataie seokako man·taiskaaha aro 2018 bilsiona kingking Sohiong-ni MLA ong·e kamko ka·angtaiaha.
2018 bilsini Assembly election-o ua HSPDP-ni Samlin Malngiang-ni jako amako man·rikskaahachim.
