AMPATI: Re·baenggipa February-ni 27 tariko ong·atenggipa Meghalaya Legislative Assembly election-na South West Garo Hills a·jaoba kamrangko ka·chichasotokengahaon, Sombar salo Election Commission of India (ECI)-ni watatako man·gipa Special General Observer Yogendra Tripathi aro Special Police Observer Vivek Johri, Ampati-ona sokbae, South West Garo Hills a·jao Assembly election-na tarisamsoanirangko nipilangaha. Kamrangko nipilna gita special observer-rangni tom·aniko Ampati Circuit House-o ong·atangaha aro ia tom·anio a·jani General Observer Sanjeev Shrivastava, Police Observer Amit Kumar Jain, SWGH a·jani District Election Officer G Kharmawphlang, Superintendent of Police (SP) Vikash Kumar aro gipin official-rangba dongpae bak ra·angaha.
ECI-ni watatako man·gipa special observer-rang apsan salon, Assam a·dokni samba jolrango donggipa South West Garo Hills a·jani mitam polling station-rangkoba niangjolaha.
Election-na kamrangko name tarisamsoengani gimin SWGH a·jani election official-rangko mittelpilangengon, election-ni somoio mikrake donganian mongsonggipa kam ong·a ine Special General Observer parakataha.
Sorkario kam ka·gipa manderangni political dolrangna kam ka·anichi MCC-ko pe·ani gimin janapatengon, election-ni somoirango maming dakeba sorkario kam ka·gipa manderang political dolrangna jak on·na man·ja ine mikkangchi sorkario kam ka·giparangko mikrakatna gita iandake niam pe·giparangni kosako rakbatgipa sastirangko on·china Tripathi ge·etangaha.
Ia tom·anio Special Police Observer Vivek Johri-ba, niam retirangko rakkina tarisamsoanirangko nipilangengon, election-ni somoio maiba a·selrang ong·genchimode ta·raken nangani kri ja·kurangko de·china a·jani police-rangko didiangaha.
