TURA: Phulbari police station-ni ning·o donggipa Nimaikata songo niam gri chalaienggipa saw mill damsako Sombar salo, Garo Hills Autonomous District Council (GHADC)-ni Forest department, rim·na man·aha aro ia saw mill-oniko truck 15 bolrangko man·aha ine kobor on·aha.
Koborko on·ani gitade, GHADC-ni forest guard-rang, Chibinang jol gita truck gari bolsao bol salangako nikrike ia gariko ja·rikangaha. Forest official-rangni u·iatani gitade, ia saw mill-o sak 10-mangni gita manderang kamko ka·engachim aro ia biapona forest guard-rang sokangon, ia biapo kam ka·enggipa manderang ua biaponi katsotokaha.
Batanggimin bilsirangonin ia jolrango aro mongsongbate Rajabala jolrangoni Tikrikilla jolrangona kingkingan niam gri saw mill ba bol ratani karkanarangko chalaiengachim aro kobor on·ani gitade ia jolrango dam 200-na baten niam gri chalaienggipa saw mill-rang dongachim.
Indake ong·engon, Nimaikata songo niam gri chalaienggipa saw mill-ko forest official-rang rim·ani ja·man ia saw mill-o jakkalenggipa bosturang aro bolrangkoba rim·aha.
Indake ong·genchimoba, ia saw mill-ko chalaienggipa nokgipani gimin ia jolrango donggipa manderang darangba aganna gita jechaktokaiaha ine Forest official-rang u·iataha.
“Chinga ia saw mill-ni kosako mokordoma ka·na miksongachim indiba darangan ia saw mill nokgipani bimingko parakna siktokjaenga. Ia saw mill-o jakkalenggipa pilak bosturangko aro bolrangkoba chinga rim·aha aro chingni office-ona re·batokaha,” ine Phulbari-ni ranger MP Marak parakataha.
Garo Hills-o niam gri chalaienggipa saw mill-rangko mikkangchiba uamang bon·atna rake kamko ka·angkugen ineba Forest official parakataha.
