TURA: Dal·dalgipa political dolrang Meghalaya a·doko grangrangko badalna jotton ka·enga indiba NPP-ni balwa namen bilakengani gimin gipin dolrang susae amchaktokjawa ine Budbar salo, National People’s Party (NPP)-ni national president Conrad K Sangma, North Garo Hills a·jani Resubelpara aro Mendipathar constituency-rango NPP-ni candidate-rangna campaign ka·anganio parakataha.
Batanggimin bilsi bongani gisepo Meghalaya a·doko bang·bata political dolrangan bilgriangaha aro NPP-sa bilakbatbaskaaha ineba ua aganaha.
Conrad-ni aganani gitade, 2018 bilsini Assembly election-ode Meghalaya a·doko politics-ni gita obostarang namen dingtangachim indiba ia 2023 bilsiode NPP bilakbatahani gimin gipin dolrang susae amchakjawaha.
“Batanggimin bilsirango Congress dol, Garo Hills-o namen bilakgipa ong·achim indiba bang·bata dilgiparangan TMC-o napangtokahani gimin da·o Congress dol bilgriaha. Congress aro Trinamool Congress (TMC) dolgnian doltangtangko bilakatna gita rakbee kamrangko ka·enga indiba chu·sokna man·jawa,” ine ua aganaha.
Ia election-o name chanchiesa dilgipako seokchina manderangko didiangengon, NPP dolmangmangsan manderangni neng·nikanirangko knachake, a·doko namroro silroroaniko ra·bana kamko ka·gipa dol ong·a ine NPP-ni national president parakataha.
“2018 bilsio ku·mikchetanirangko NPP chu·sokataha aro da·o mikkangchiba namroro silroroaniko ra·bana on·kangengkua. Manderangni neng·nikanirangko knachakanian NPP-ni mongsonggipa daito ong·a,” ine ua aganaha.
Ia 2023 bilsio NPP, dolsanchi chegope sorkariko rikna ka·dongenga ineba Sangma parakataha.
Batanggimin bilsi 30-ona bate bilsi gittamni gisepon NPP-chi dilgipa sorkari, rama jal·langrangko bang·bate tarie on·na man·aha ineba NPP-ni national president parakataha.
