SHILLONG: Re·baenggipa February-ni 27 tariko Meghalaya Legislative Assembly election-ko ong·atengon, Election Commission of India (ECI)-ni ge·etanio pangchake, dilgipako seokenggipa manderang, mobile phone-rangko polling station ning·chi ra·napna man·jawa ine a·dokni Election department u·iataha.
“Darangba aro mongsongbate pu·onna re·baenggipa manderang, mobile phone, cordless phone, wireless set ba uandakgipa ostrorangko polling station-ni meter 100 ning·o aro polling booth-o ra·napna man·jawa,” ine Meghalaya a·dokni Chief Electoral Officer FR Kharkongor parakataha.
CEO-ni u·iatani gitade, polling station-rango observer-rang, micro observer-rang, presiding officer-rang aro security guard-rangsan mobile phone-rangko ra·napna man·aigen indiba uamang an·tangtangni mobile phone-rangko ‘silent mode’-o donskana nanggen.
Pu·onengmiting somoio mitam manderang, mobile phone-rangko jakkalsretnaba gnang ine kenchakna nanganirang dongengani gimin election-ni somoio mobile phone-rangko polling station-o ra·napaniko champengataha ineba CEO u·iataha.
