SHILLONG: Re·baenggipa February-ni 27 tariko ong·atenggipa Meghalaya Legislative Assembly election-na kamrangko ka·chichatoksoanio dingtang dingtang dolrangni gisepo matnanggrikanirang, dinggrikanirang aro kragija kamrangko ka·tokengon, ia election-ko tom·tomao aro nama bewalo matchotatna man·na gita pilak dolrangkon name bak ra·china aro a·doko songdongenggipa manderangkoba name chanchiesa dilgipako seokchina Khasi-Jaintia Christian Leaders Forum (KJCLF) didiangaha.
Adita salrangna skang, Kristianrangni ring·ani ‘I have decided to follow Jesus’ ba ‘Jisuni ja·man anga ja·rikgen’ ingipa gitiko badiaba political dolrangna kam ka·enggipa manderangni, ong·gija dake ring·aniko jegalatengon, ian Kristianrangko chonnikani gita ong·a ine KJCLF parakatenba, iandakgipa dol ba candidate-rangni gimin chanchie dilgipako seokchina a·dokni manderangko didiataha.
Election-ni somoio kragija kamrangko ka·jachina ba aganjachina, ong·gija dakgipa cholrangchi campaign-rangko ka·jachina aro so·sojengjeng ong·atani kamrangko ka·jachina gitaba KJCLF, dingtang dingtang political dol aro candidate-rangko didiataha.
“Uni gimin pu·onani salo an·tangtangni gamchatgipa vote-rangko kakketo aro name chanchiesa on·china chinga a·dokni mande sakantikon didienga. Ia election-o an·ching gital sorkariko seoknasa pu·onengani gimin tom·tomani aro namroro silroroaniko ra·bana gita name chanchiesa dilgipako seokna nangenga,” ine KJCLF-ni secretary Rev EH Kharkongor parakataha.
