B-Mahal-ni a·arangko palani bidingo jegale tom·bimonga

TURA:  West aro North Garo Hills a·jani ning·o ga·akgipa B-Mahal-ni a·arangko a·dok sorkarini Meghalaya Industrial Development Corporation (MIDC) aro Meghalaya Tourism Development Corporation (MTDC)-na Garo Hills Autonomous District Council (GHADC)-ni Executive Committee pale galaha ine matnanganirangko nikna man·engon, ia a·arangko jolni manderang aro songni nokmarang baksa agangrikchenggija sorkarina on·ahani gimin jegalna gita Save B-Mahal Committee, songni nokni dilgiparang aro songdongenggipa manderang baksa Hatogaon songni kal·chakramo jinma tom·bimonganiko ong·atangaha.
Ia tom·bimonganiko ong·atanio Save B Mahal Committee-ni convenor Rimjen Ch Sangma, jinmana aganprakengon, Garo Hills-ni a·arangara Tribal manderangni a·arangsa ong·genchimoba, ia a·arangko District Council-ni dilgiparang, songni nokni dilgiparang aro songni manderang baksa agangrikchenggija sorkarini kamna pale galaha ine matnangatenba, ia a·arangko Garo Hills-ni manderangna on·pilna nangchongmota ine dabidilangaha.
MIDC aro MTDC baksa songgigrikaniko den·galpile B Mahal-ni a·arangko ia jolo songdongenggipa manderangna on·pilchina gitaba ia tom·anio jinma dabiangtokaha.