TURA: West Garo Hills a·jao donggipa dam 537 polling station-rango kamko ka·enggipa election personnel-rang Robibar salni gisepon biaptangtangona soktokaha.
Ia dol 537 polling personnel-rangoni dol 436-de Sonibar salni bakon, an·tangtangni polling station-rangona soktokahachim aro bangki dol 101 polling personnel-rangde, Robibar salni bako polling station-rangona sokangtokskaaha.
Election-ni kamko ka·enggipa dolrang, an·tangtangni polling station-rangona re·angna skang, West Garo Hills a·jani Deputy Commissioner (DC) office-ona re·ange, election-o jakkalna nanggipa EVM, VVPAT machine-rang baksana nangchongmotgipa lekkarangko ra·angtokaha.
Sonibar salo, polling station-ona re·anggipa polling personnel-rangoni dolsa, chong·motan Tikrikilla constituency-ni ning·o donggipa Jangrapara polling station-o kam ka·na donatako man·gipa manderangde, Potamati jolo gari a·sel ong·ahachim aro ia a·sel ong·anio 2nd polling officer-de janggitangko gimaatna nangahachim.
Indake ong·genchimoba ja·mano ia dolni pal gipin polling personnel-rangko ia polling station-ona watatskaaha.
