ALS-ni gita National Seminar aro Int’l Mother Language Day-ko ong·atanga

TURA: A·chik Literature Society (ALS) aro NEHU Tura Campus-ni ning·o donggipa Garo Department-ni nangrime ong·atgipa National Seminar-ko re·anggipa February-ni 22 tariko, dingtangmancha Valedictory function-ko NEHU Tura Campus-o ong·atenba matchotataha.
Ia National Seminar-ko ong·atanio ki·tap serakgiparang, scholar-rang, NEHU Tura Campus-ni chatro chatrirang aro Tura-o donggipa mitam college-ni chatro chatrirangba bakko ra·angtokaha.
Ia National Seminar-ni Valecdictory program-o NEHU Tura Campus-ni Campus-in-Charge Prof Sujata Gurudev, mongsonggipa sokgipa ong·e aganprakangengon, jatni ku·aganani, dakbewal rikbewal aro sea jotanirangko ripingna nangani gimin aganangaha.
“A·chik Literature Society, A·chik jatni dakbewal-rikbewalko aro ku·tango sea-jotaniko mangrakatna kamko ka·enga. Jatni ku·sik, daka-rika aro pagitcham-ma·gitchamrangoni ka·baenggipa nama kamrangko an·ching ripingna nanga. Uandakgipa dakbewal rikbewalrangan an·chingni janggi-silchi ong·a. Jatni ku·sik, dakbewal-rikbewal aro sea-jotani dongjaon, an·ching sia gita ong·a. Da·ororo a·gilsak gimikon jattangni dakbewal-rikbewal aro jatsa ong·e dingtanganiko ripingna pilak manderangan jotton ka·enga. An·ching jattangni daka-rikanirango rasong chana nangchongmota,” ine Prof Gurudev aganaha.
Ia Valedictory program-o ALS-ni vice president Giribala G Momin-ba jinmana aganprakengon, “Jatni ku·sik, sea-jota aro dakbewal-rikbewalrango nambatatna A·chik Literature Society kamko ka·enga. Ku·sikko, sea-jotaniko aro jatni dakbewal-rikbewalrangko ning·tue sandie skie ra·anichi jatko ra·dona man·gen. Ia minggittam a·bao skie ra·anio nangrimani dongani gimin, mande jatni gamchatani aro dakbewal-rikbewalko tangdoatna man·gen,” ine parakataha.
Ia National Seminar-o paper-rangko poraigipa manderanga, Gauhati University-ni ning·o donggipa Bodo Department-ni Dr. Faguna Barmahalia, Assam Damra-oni Dr. Tharsush K. Sangma, Williamnagar-oni Pa Kroshnil D. Sangma, Tura-oni Pa Chenggan A. Sangma aro jatni doka-dam·aniko tarigipa Rombagre-oni Pa Dewal M. Sangma ong·a.
Gipin seminar paperrangko sebagiparanga, Prof. Milton S. Sangma, Prof. Caroline R. Marak, Dr. Barbara S. Sangma, aro research scholar-rangoni Nambebalche S. Sangma, Christina D. Sangma, Jakmatchi M. Sangma, aro NEHU Tura Campus-ni ning·o donggipa Garo Department-o skigiparangoni, Dr. Crystal C. D. Marak, Prof. Fameline K. Marak, Dr. Dokatchi Ch. Marak aro Dr. Jacqueline R. Marak ong·a.
Valedictory function-o paper sebagiparangna certificate-rangko Garo Department-ni Head Dr. Jacqueline R. Marak aro ALS-ni vice president Ma Giribala G. Momin-ni jakchi on·angaha.
Indake ong·engon, February-ni 21 tarikoba A·chik Literature Society (ALS), NEHU Tura Campus-ni ning·o donggipa Garo Department baksa nangrime, International Mother Language Day-ko NEHU Tura Campus-o maniangaha.
Ia tom·aniko ALS-ni vice president Basanio R Marak-chi Nokgipa Isolo bi·e a·bachengaha aro rimchaksoani kattarangko NEHU Tura Campus-ni ning·o donggipa Garo Department-ni Head Dr Jacqueline R Marak aganangaha.
Ia tom·anio ALS-ni executive membor Rev Dr Namseng R Marak, jinmana aganprakengon, Mother Language ba ma·ani ku·sikni gamchataniko ripingna nangani gimin aganangaha.
Ia manianio ‘Ku·skia Aman Dingdinga’ poedoko Labour & IPR-ni gitcham Joint Secretary aro MCTF-ni Commandant MK Marak poraiataha aro ia tom·anio NEHU Tura Campus-ni ning·o donggipa Garo Department-ni skigiparang, chatro-chatrirang aro scholarrang an·tangtangni sebagimin paper-rang aro poedorangko poraiatokaha.