SHILLONG: 10-Jirang Legislative Assembly Constituency-ni MLA aro NPP candidate Sosthenes Sohtun, ia election-oba an·tangni chepiltaina ka·dongenganiko parakataha.
Sombar salo, an·tangni vote-ko on·angani ja·man kobor ra·timgipa manderang baksa agangrikengon, batanggimin bilsi bongani gisepo NPP-ni dilanichi MDA sorkari, Jirang constituency-nasan ong·aigija a·dok gimiknan namroro silroroaniko ra·bana man·ahani gimin ua ia changoba chepiltaina ka·dongenga ine Sohtun parakataha.
“Uni gimin manderang chingni kamrangko nigen aro kakketko agangenchimode mijalonin manderang angna phone ka·atenba, batanggimin bilsi bongani gisepo uamang bang·en namroror silroroaniko nikahani gimin angnan pu·ongen ine angna aganataha,” ine bilsi 48 ong·gipa Jirang MLA aganaha.
2018 bilsio Sohtun, Congress dolni candidate Witness Day Sancley-ko 220-mangmang vote-chi cheahachim ine nikna man·a.
Ia changode ua Congress dolni dambebatgipa candidate Adrian Lambert Mylliem aro gipin sakdok candidate-rang baksa susagrikskana nangengachim indiba ia changode ua bang·bata vote-rangchi an·tangni bobilrangko chegen ine NPP candidate, an·tangni ka·dongenganiko parakatskaaha.
“BJP aro TMC-ni dambe candidate-rang donggenchimoba anga an·tangde uamangna maming kenchakna nanganiko nikja maina Jirang-ni chadamberang aro pilakan angbaksa ong·a. Batanggimin bilsi bongana anga maiko dakaha constituency-ni manderang pilakan ma·sia,” ine Sohtun parakataha.
NPP-chi dilgipa MDA sorkarini kosako tangka paisa jakkalsreta ine opposition dolrangni matnanganirangna aganchakaniko on·angengon, “Election-na skangde opposition dolrang pangnan sorkari chalaigipa dolko matnangaia,” ine NPP candidate parakataha.
