TURA: North Tura constituency-o pu·ongiparangko ka·mikkenatna jotton ka·aha ine matnangenba, National People’s Party (NPP) aro Bharatiya Janata Party (BJP) dolrang, dolsa dolgipinko 50-North Tura (ST) LAC-ni Returning Officer-na badi ka·grikangaha.
Skanggipao North Tura constituency-ni NPP-na election agent dake kamko ka·enggipa Gilmore FG Momin, BJP-ni candidate-na kamko ka·enggipa manderang, Tura Bazar jolo donggipa North Tura-ni dingtang dingtang voter-rangna dingtang dingtang mobile nombor-rangoni phone ka·atenba, ka·mikkenatanirangko on·aha ine North Tura constituency-ni Returning Officer-na badi ka·doangahachim.
BJP-ni manderang, North Tura-ni voter-rangko ka·mikkenatenga ine matnangenba, ia manderangni kosako nanga gita ja·kurangko de·china NPP-ni election agent, badi ka·doangahachim.
Indake ong·engon, ja·mano North Tura-ni BJP candidate-na election agent dake kam ka·enggipa Shirley M Sangma-ba, NPP-na kam ka·enggipa mande saksani kosako North Tura-ni Returning Officer-na badi ka·doangskaaha.
NPP worker-ni kosako badi ka·doangani gitade, ia mandeko re·anggipa Robibar walo aro Sombar pringoba polling station damsao manderangna tangka sualako nikna man·ahachim. Uni iandake tangka paisarangko sualani giminsa ja·mano BJP-ni candidate aro party worker-rang una phone ka·atenba, iandakgipa kamrangko ka·jachina aganatahachim. Uko iandake aganatani ja·man ia mande, polling station damsaona re·angenba, BJP-ni voter-rangko aro BJP-na chakenggipa manderangko kragija dakna a·bachengskaaha.
Uandaken, ia mandeni ong·gija dakgipa kamrangna uni kosako rakgipa ja·kurangko de·china gita BJP-ni election agent-ba North Tura-ni Returning Officer-ko didiatskaaha.
