SHILLONG: Ia chang election-oba vote-rang priprae bon·gen aro darangba Bharatiya Janata Party (BJP)-ni bakrimani gride sorkariko rikna man·jawa ine BJP-ni dilgipa AL Hek a·kangataha.
Iani bidingo kobor ra·timgipa manderang baksa agangrikengon, ia election-o BJP rakbee kamrangko ka·aha aro Meghalaya a·doko BJP-ni dilanichi gital sorkariko rikgen ine Hek parakataha.
“Darangba seat-rangko bang·bate chena man·jawa aro chinga bakrimesa sorkariko rikna nangtaigen. Ching apsan dake chanchigipa dolrang baksa kamko ka·gen aro BJP gride darangba sorkariko rikna man·jawa,” ine ua aganaha.
BJP-ni national general secretary Rituraj Sinha-ba, sorkariko rikanio BJP dolan mongsonggipa ong·gen ine an·tangni ka·dongchakenganiko parakataha.
“Ia changode BJP, batanggimin changona changgni bate vote-rangko man·gen aro chingni seat-rangko cheani bang·bata manderangkon jagokmanatgen,” ine Sinha aganaha.
Sinha-ni aganani gitade, batanggimin changrangode BJP-ni vote man·aniara 9 ba 10 percent-mangsan ong·rongaiachim aro BJP-ni candidate-rang bang·batan cherongjachim.
Indiba ia changode election-ni result-rang bang·batakon jagokmanatgen ine BJP-ni national general secretary parakataha.
Congress aro gipin dolrangni sorkariko chalaiani somoi a·doko maming namroro silroroanirang dongja ine a·dokni manderang ma·sitoka ine janapatengon, ia dolrangni sorkariko chalaiani somoirango bilo ong·enggipa mitam manderangsan namgnirangko man·aiaha aro a·dokni manderangde rama jal·langrang, bijoli, sanna banani aro uandakgipa pilak kamrangon neng·nikanirangko chagrongna nangtokaha ine Sinha parakataha.
Ia pilakan tangka paisarangko jakkalsretahani a·selan ong·a ineba ua aganaha.
