TURA: Re·anggipa Sombar salo, Tura Rongkhon Songgital gittimni abisa sakgni, Tura jillani samba jolo donggipa Sella wario sripe siaha.
Ia abisa sakgniara bilsi 19 ong·gipa Akanchi A Sangma aro bilsi 17 ong·gipa Sania A Sangma ong·achim aro Sombar salo uamang, chutti ong·ani gimin Sella wariona an·tangtangni jilgipa achakko auatna rimangahachim.
Achakko auatengmiting somoio ta·rake jokenggipa chi man·pakangani gimin abisa sakgnioni saksa achakko jokatna ine chiona chokonangahachim indiba uko chi man·pakangskaaha. Uko chi man·pakangengani gimin abisa sakgnioni saksaba uko jokatna gita chiona chokonangaha indiba rasong gribee sakgnian janggitangtangko gimaatna nangaha.
Koborko on·ani gitade, abisa sakgnioni dal·batgipa Akanchi A Sangma-de da·o B.Sc 1st year-o poraiengachim aro nogipa Sania A Sangma-de Class XI (11)-o poraiskaengachim.
