SHILLONG: Assembly election-ko ong·atanggipa salgro salaramni damgittam a·dokrang, chong·motan Meghalaya, Nagaland aro Tripura a·dokrango National Democratic Alliance (NDA) sorkariko riktaigen ine Mongolbar salo, North East Democratic Alliance (NEDA)-ni convenor aro BJP-ni dilgipa Himanta Biswa Sarma parakataha.
Tripura a·dokni Assembly election-ko re·anggipa February 16 tariko ong·atenba, Meghalaya aro Nagaland Assembly election-kode February 27 tariko ong·atangskaahachim ine nikna man·a.
Indake ong·engon, batanggimin bilsi bongana Tripura a·doko BJP-ni dilanichi sorkariko rika gitan ia changoba sorkariko rikpiltaigen aro Meghalaya baksana Nagaland a·dokrangoba batanggimin bilsi bongana sorkarini bak ong·a gitan ia changoba BJP bak ong·piltaigen ine NEDA-ni convenor aro Assam-ni chief minister parakataha.
Ia damgittam a·dokrangon Trinamool Congress (TMC) aro Congress dolrang baksade BJP bakrimjawa ineba Sarma parakataha.
2018 bilsini Meghalaya Assembly election-ode BJP, seat damgnikosan cherikaiahachim indiba ia changode bang·bate seat-rangko chena miksongengani gimin a·dokni dam 60 constituency-rangon susaahachim ine nikna man·a.
