SHILLONG: Re·anggipa Sombar salo ong·atanggipa Meghalaya Legislative Assembly election-o pu·onani 85.17 percent-ona tang·doangaha ine Mongolbar salo, a·dokni Chief Electoral Officer (CEO) FR Kharkongor u·iataha.
Sombar walona kingkingde chel·gipa polling station-rangoni report-rang aro polling party-rang sokbatokkujani gimin a·dok gimiko pu·onani 76.32 percent-san ong·kuengachim indiba ja·mano dingtang dingtang chel·gipa polling station-rangoni polling party-rang sokbaani ja·man pu·onani 85.17 percent-ona tang·doangaha ine CEO parakataha.
Indake ong·genchimoba ia hisapo postal ballot-rangkode man·chapja ineba CEO parakataha.
Sohiong Legislative Assembly Constituency-ni election-ko dingtang salona ra·doatjagenchimode 86 percent batangnaba dongachim maina ia constituency-ode bang·a manderangan dilgipako seokanio bak ra·rongachim ineba Kharkongor parakataha.
Re·anggipa February-ni 20 tariko, a·dokni gitcham home minister aro United Democratic Party (UDP)-ni candidate HDR Lyngdoh, tanggitik ka·tong saaniko man·e siangahani gimin Sohiong constituency-ode MLA election-ko dingtang salona ra·doatskaahachim aro uandaken Sombar salo, a·dok gimikni dam 59 constituency-rangna ia election-ko ong·atchengahachim.
A·dokni bang·bata biaprangon pu·onani tom·tome matchotahaoba badiaba badiaba polling station-rango EVM-rang nosto ong·ani a·sel bang·gija neng·nikanirangko chagrongna nangaha ineba CEO u·iataha.
2018 bilsini Assembly election-ode a·dok gimiko manderangni pu·onani 86.65 percent ong·ahachim aro una skang 2013 bilsiode 86.88 percent ong·skaachim.
