TURA: Adita salrangna skang, Meghalaya Assembly election-na campaign ka·na dongimin somoi batani ja·manoba Dalu constituency-ni ning·o donggipa songrangona re·ange, manderangna tangka paisarangko sualna jotton ka·ahani gimin rim·ako man·ani ja·man songni manderangni kosako tol·e sakkirangko on·pangpilna jotton ka·ahani gimin Association for Democracy & Empowerment (ADE)-ni president Dalseng Bira Ch Momin-ni kosako Doldenggagre songni manderang, Dalu police station-o FIR ka·doangaha.
Doldenggagre songni manderangni FIR-o parakatani gitade, re·anggipa February-ni 25 tarik attam 4:00 bajion election-na campaign ka·ani somoi bon·ahani gimin walni somoio songni manderang an·tangtangan ong·gija dakgipa manderangko nirikkiengachim aro attamni 7:00 bajimango ADE-ni president Dalseng Bira Momin, ML-08G 0070 Wagon-R gario, an·tangni manderang baksa re·baengmitingo songni manderang uamangko Doldenggre dolongo nike sing·on, uamang Duripara songona mande salangenga ine aganahani gimin songko nirokenggipa manderang uamangko watataiahachim. Indake ong·genchimoba, Dalseng Bira Momin aro sakgipin mande saksa, ua biaponi chel·gijan Doldenggagre Dam-o ong·onrikaha aro uamangni re·bagipa garide Duripara songona re·anggija Ruga A·king Nokmani Rubber bagan-onasa re·angskaaha ine FIR-o janapaha.
“Dalseng Bira aro unbaksa re·bagipa mandede mi a·pal jangchi gita Baptist gilja nok ramaona re·baengachim aro unon songni manderang uamangni sriksrik re·baengako niksoe light natatenba, sawarang ine sing·ataha. Songni manderang uamangko iandake sing·on, uamang mamingkoba aganchakgija ua biaponi katna jotton ka·aha indiba ja·mano Dalseng Bira-ko Nokmani fencing kagipao ja·a bajie dongako rim·ena man·aha aro sakgipinkode Nokma gitchamni gopramona katangako songni manderang rim·na man·aha,” ine FIR-o songni manderang parakatenba, Dalseng Bira-ni ia kamo jak dongako bebera·tokjawa ine ma·sienba sakkina songni manderang uko video ka·eba ra·aha ine talataniko on·angaha.
Ia manderangko songni manderangni rim·ako ma·sijae, Bolero gari bolsaba ia songni rama gita re·bamitingo songni manderang sing·on, uamangba apsan daken Duripara songchi re·enga ine aganchakahani gimin ja·mano uamangni aganako bebera·jae name sing·sandiangkuon, ia garini manderang gariko sale katna jotton ka·ahachim indiba sale katna man·jae, garioni ong·one katskaaha ineba FIR-o parakataha.
Ia Bolero gario re·bagipa manderangara, Jepal M Marak aro Dikkan Marak ong·achim aro uamangko Masangpani skul waiting shed-oniko rim·na man·aha ine songni manderang, FIR-o parakataha.
Songni manderang uko rim·gittangenba kragija dake doke sate roaha ine Daleng Bira Momin-ni social media-rango matnanganirangko jegalatskaengon, uni niam pe·e ong·gija dakako rim·a man·ahani giminsa ua songni manderangko dos galskana gita iandake social media-rango tol·gipa kattarangko parakataha ine Doldenggagre songni manderang talataniko on·angaha.
“Dalseng Bira Momin-ni chingko tol·e matnanganirangna chinga uko adita sing·anirangko dakskana nangnikenga. Sako ua Duripara songona salangengachim? Duripara songona sokgijaan maini gimin sakgipin mande baksa mai miksonganio Doldenggagre dam-o ong·onrikaha? Su·bunasa ong·katachim ine ua agana, su·buna ong·katode maini gimin Nokmani a·pal jangchi gitasa Gilja nok ramaona re·sotangengachim? Su·buna ong·katbebeode maini gimin garioni chel·pile, denggu manderang gita sriksrik Gilja nok ramaona re·baengachim? Su·buna ong·katode maini gimin uko salbagipa garira uko senggija gipin rama gita re·angskaaha? Songni manderang uko kidnap ka·a ine ua matnangenga, uko kidnap ka·bebeode songni manderang, police-rangna ba election observer-rangna u·iatgenchimma? Uko songni manderang doka ga·tinga ine matnangenga, uko indake dakbebegenchimode ua hospital-o admit ong·na nangjawachimma aro uni be·en bimangrango doka satani dagirang dongjawachimma?” ine FIR-o Doldenggagre songni manderang sing·doataha.
ADE-ni president Dalseng Bira Momin-ni ka·mikkenatanirangko man·e songni manderangna chel·chakanirangko on·china gitaba Doldenggagre songni manderang, police-rangko didiataha.