SHILLONG: Meghalaya a·dokni gitcham home minister aro United Democratic Party (UDP)-ni candidate HDR Lyngdoh-ni siangani ja·man Sohiong Legislative Assembly constituency-ni election-ko dingtang salona ra·doatskaahaon, ia constituency-o sianggipa HDR Lyngdoh-ni gritang Synshar Lyngdoh-ko susaatskachina gita UDP Sohiong circle ku·pattianiko on·angaha.
Iani bidingo kobor ra·timgiparangna u·iatengon, gitcham home minister-ni biapo uni grigipako UDP-ni candidate ong·e susaatskachina UDP Sohiong circle-ni ku·pattie seatgipa chittiko man·soaha ine Budbar salo, UDP East Khasi Hills-ni district president Titosstarwell Chyne parakataha.
“UDP Sohiong circle-ni ku·pattie seatgipa chittiko anga UDP-ni state election committee (SEC)-ni mikkangona ra·anggen. Party tikitko on·ani bidingo SEC-sa bon·kame tik ka·gen,” ine Chyne aganaha.
Sohiong Assembly constituency-ni election-na bakan Election Commission of India (ECI) tarikko parakatgen ineba ua an·tangni ka·dongchakenganiko parakataha.
Re·anggipa February-ni 20 tariko, a·dokni gitcham home minister aro United Democratic Party (UDP)-ni candidate HDR Lyngdoh, tanggitik ka·tong saaniko man·e siangahani gimin Sohiong constituency-ode MLA election-ko dingtang salona ra·doatskaahachim aro uandaken ia constituency-ode gipin constituency-rang baksa apsan election-ko ong·atjahachim.
A·dokni gitcham home minister HDR Lyngdoh, 2018 bilsini Assembly election-o Congress doloni susae amako man·rikahachim aro ia changoba ua United Democratic Party (UDP)-oni Sohiong constituency-o susataiengachim.