SHILLONG: Meghalaya a·doko namroro silroroaniko ra·bana gita Bharatiya Janata Party (BJP), je political dol baksaba bakrime kamko ka·na kusi ong·aigen aro Trinamool Congress (TMC) baksana Congress dolrangba BJP baksa agangrikeode uamangnaba pangnan do·gako oe donaienga ine Budbar salo, BJP-ni dilgipa AL Hek parakataha.
“TMC aro Congress dolrang BJP-ona re·bae agangrikeode chinga pangnan do·gako oe donaienga. A·doko namroro silroroaniko ra·bana gitade BJP, je dol baksaba bakrime kamko ka·na kusi ong·aigen,” ine Hek aganaha.
Dingtang dingtang News channel-rangni exit polls-o NPP-ko seat bang·bate chegen ine mesoksogipani gimin sing·on, ua an·tangde exit polls-rango bebera·gipa ong·ja aro ua an·tangni hisapni gitade darang dolan Meghalaya a·doko dam 15-na bate seat-rangko chejawa ine Hek parakataha.
Ia chang election-o BJP, dam 24 seat-rangko cheani cholrang dongenga aro indita seat-rangko man·jagenchimoba dam 8-oni dam 10 seat-rangkode chetelgen ineba Pynthorumkhrah constituency-ni BJP candidate parakataha.
Sorkariko rikna gita Himanta Biswa Sarma aro Conrad Sangma-ni gronge agangrikani gimin sing·skaon, dingtang dingtang dol aro dilgiparangni gisepo agangrikanide maming dal·a katta dongja indiba ja·manosa uamang, saming bakrime sorkariko chalaigen, ukode chanchigen ine Hek parakataha.
“Na·simang angko sing·genchimode, chinga bakrime kamko ka·na man·na gita aro tangka paisa jakkalsretani grigipa sorkariko rikna gita chinga apsan dake chanchigipa dolrang baksa sorkariko rikna sienga,” ine ua aganaha.
Meghalaya Assembly election-ni result-rangko da·al Bristibar salni bako parakna siengahaon, NPP-ni national president Conrad K Sangma aro BJP-ni dilgipa Himanta Biswa Sarma, re·anggipa Mongolbar salo, Guwahati songjinmao gronggrike agangrikangahachim ine nikna man·a.
