Assembly election-o NPP dam 26, UDP dam 11, AITC aro Cong dam 5-prak chea

TURA/SHILLONG: Ia 2023 bilsini Meghalaya Legislative Assembly election-ni result-rangko Bristibar salo parakataha aro result-rangko parakatanio National People’s Party (NPP), dam 26 seat-rangko chee bang·bate seat-rangko chegipa dolba ong·aha.
NPP-ni ja·man United Democratic Party (UDP) dam 11 seat-rangko cheenba, seat-rangko bang·bate cheanio gnigipa ong·skaaha. Uni ja·man Indian National Congress (INC) aro All India Trinamool Congress (AITC) dolrangba dambonga ka·e seat-rangko chena man·aha.
Meghalaya Assembly election-o skanggipa changna susaanggipa Voice of the People’s Party (VPP) dam 4 seat-rangko cheangskaaha aro uni ja·man, PDF, BJP, HSPDP dolrangba damgni ka·e seat-rangko cheangaha.
Vote-rangko Bristibar pring 8:00 bajioni channa a·bachengaha aro attamni 6:30 bajimangosa matchotaha.
Ia chang Assembly election-oba NPP-ni national president Conrad K Sangma, South Tura constituency-o chepiltaina man·aha aro Thomas A Sangma-ba North Tura constituency-o chepiltaina man·aha. Indake ong·genchimoba, a·dokni gitcham Cabinet minister aro Dadenggre constituency-o changgittamna kingking MLA ong·anggipa James K Sangma-de 18 vote-rangchi AITC-ni candidate Rupa M Marak-ni jako amako man·rikskaaha.
Rajabala-ni gitcham MLA Abdus Saleh-ba ia chango, 10 vote-rangchi AITC-ni Dr Mizanur Rahman Kazi-ni jako amako man·rikaha.
Shillong-ni Lok Sabha MP aro Meghalaya Pradesh Congress Committee (MPCC)-ni candidate Vincent H Pala-ba Sutnga-Saipung constituency-oni susae, NPP-ni Santa Mary Shylla-ni jako amako man·aha.
A·dokni gitcham chief minister aro AITC-ni dilgipa Mukul Sangma, Tikrikilla constituency-ode NPP-ni Jimmy Sangma-ni jako amako man·aha indiba Songsak constituency-o ua an·tangni biapko ra·piltaina man·skaaha. Uni jikgipa aro AITC-ni candidate Dikkanchi D Shira-ba Mahendraganj constituency-o NPP-ni Sanjay A Sangma-ni jako amako man·rikaha.
Mukul Sangma-ni jonggipa aro gitcham Minister Zenith M Sangma-ba ia chang, Rangsakona constituency-o NPP-ni candidate Subir Marak-ni jako amako man·rikaha.
Umroi constituency-ni gitcham MLA aro AITC-ni dilgipa George B Lyngdoh-ba ia chang election-o NPP-ni candidate Damanbait Lamare-ni jako amako man·rikaha.
Chokpot constituency-oba AITC-ni gitcham MLA Lazarus M Sangma, NPP-ni Sengchim N Sangma-ni jako amako man·rikaha.
Baghmara-ni gitcham MLA Samuel M Sangma, ia chang election-o BJP-oni susaskaahachim indiba ua Independent candidate Kartush R Marak-ni jako amako man·rikaha.
Gambegre constituency-o INC-ni candidate Saleng A Sangma baksana NPP-ni Rakesh Sangma, AITC-ni Sadhiarani Sangma aro gipin candidate-rang bilakbee susagrikahachim indiba bon·kamao, INC-ni candidate aro Gambegre-ni MLA Saleng Sangma chegipa ong·piltaina man·aha.
Ia election-o AITC dol, dambonga seat-rangkosan chena man·aiaha aro ia seat-rangara, Songsak, Ampati, Nongthymmai, Dadenggre aro Rajabala constituency-rang ong·a.
Re·anggipa February 20 tariko a·dokni gitcham home minister aro UDP-ni candidate HDR Lyngdoh siangahani gimin Sohiong constituency-ni election-ko dingtang salona ra·doate, dam 59 constituency-ni election-kosan re·anggipa February 27 tariko ong·atangchengahachim ine nikna man·a.