SHILLONG: Meghalaya Assembly election-ni result-rangko Bristibar salo parakatahaon, batanggimin bilsi bongani gisepo National People’s Party (NPP)-chi dilgipa sorkariko tangka paisa jakkalsretanina bang·en matnangahani gimin ia changoba NPP-chi dilgipa sorkari baksa Voice of the People’s Party (VPP) bakrimaniko on·jawa ine parakatskaaha.
Ia bilsini Assembly election-o NPP, dam 26 seat-rangko aro VPP, dam 4 seat-rangko cheskaahachim ine nikna man·a.
Dolsanchi sorkariko rikna gita komibeoba sak 31 MLA-rangko nangengani gimin NPP, da·o sorkariko rikna gita komibeoba sakbonga MLA-rangko nangdapskaengachim.
Indake ong·engon, batanggimin bilsi bongana NPP-ni dilanichi sorkariko chalaianio bang·en tangka paisa jakkalsretanina matnanganirangko man·ahani gimin ia chang sorkariko riktaigenchimoba VPP bakrimaniko on·jawa indiba joltango donggipa dolrangni dilanichi sorkariko rikgenchimosa bakrimaniko on·gen ine parakatskaaha.
Nongkrem constituency-o seokako man·piltaiani ja·man kobor ra·timgipa manderang baksa agangrikengon, uamang jedakeba NPP-chi dilgipa sorkario bakrimna man·jawa ine VPP-ni president Ardent Miller Basaiawmoit parakataha.
“NPP-chi dilgipa sorkarini kosako inditan tangka paisa jakkalsretanina matnangtokaha indiba da·onan ia matnanganirangko ning·tue sandirokatanirang dongkuja. Indide chinga maikai iandakgipa sorkario bakrimna man·gen,” ine Basaiawmoit sing·doataha.
Indake ong·engon, People’s Democratic Party (PDF) dolba da·o dipet gital sorkario bakrimna gita chanchia dongkuja ine parakataha.
Mawkynrew constituency-o gnigipa changna seokako man·taiani ja·man, kobor ra·timgipa manderang baksa agangrikengon, iani bidingo PDF-ni dilgiparang apsan chanchie nanga gita ja·kuko de·anggen ine PDF-ni working president Banteidor Lyngdoh parakataha.
Ia chang Assembly election-o PDF, damchet constituency-rango susae, seat damgniko cheahachim ine nikna man·a.
