SHILLONG: Bristibar salo, Meghalaya Assembly election-ni result-rangko parakatani ja·man Shella aro Mairang constituency-rango so·sojengjeng ong·anirangko nikna man·ahani gimin National People’s Party (NPP)-ni national president aro South Tura-ni MLA Conrad K Sangma, an·tangni suk ong·gijaniko parakataha.
“Iandakgipa a·selrang ong·na nangjachim. Manderangni gisikrangko chinga ma·sichaka. Beben iandakgipa obostao manderang suk ong·jani a·sel dingtang dingtang biaprango adita so·sojengjeng ong·anirangko nikna man·aha indiba da·o obostarang namangaha,” ine Sangma parakataha.
Election matchotahani gimin pilak political dolrangkon tom·tomaniko rakkiangchina gitaba ua didiataha.
“Da·o election matchotaha aro an·ching pilak dakna nangani kamrangko matchotaha indiba iandake so·sojengjeng ong·ani kamrangko ka·jachina aro saksa sakgipin baksa tom·tome janggi tangchina anga pilak political dolni manderangko didina ska,” ine Sangma aganaha.
Re·anggipa Bristibar salo, Shella Assembly constituency-o vote-rangko chanengmiting somoio NPP-na chakenggipa manderang ma·sisretani a·sel Sohra-o donggipa counting centre-o adita so·sojengjeng ong·anirangko nikna man·ahachim.
Kobor on·timgipa manderangni u·iatani gitade, Shella constituency-o vote-rangko chanengmiting somoio channa matchotgijaan badiaba news channel-o NPP-ni candidate-ko cheaha ine parakataha indiba ja·mano vote-rangko chanmanahaon, NPP-ni candidate Grace Mary Kharpuri-ko United Democratic Party (UDP)-ni candidate Balajied Kupar Synrem cheahani gimin NPP-ni manderang, vote-rangko chanpiltaichina dabitokaha.
Indake ong·genchimoba, vote-rangko channanio maming gualani dongja ine vote-rangko chanpiltaina jechakon, NPP-na chakenggipa manderang, Sohra-ni counting centre-ko ro·ongrangchi gona a·bachengtokahachim.
Mairang constituency-oba, UDP cheangani ja·man, amako man·gipa candidate-ni manderang, result-na suk ong·jae counting centre-ko jinma ro·ong goe chadraptokaha aro ia a·sel ong·anio mande saksa siangna gita nangahachim.
Mairang constituency-o UDP-ni Metbah Lyngdoh, 155 vote-rangchi sakgipin candidate Batskhem Rynthathiang-ko cheangahachim.