SHILLONG: South Tura constituency-o seokako man·taigipa a·dokni Chief Minister Conrad K Sangma-ko Sukrobar pringo, National People’s Party (NPP) parliamentary party-ni dilgipa songaha.
Sukrobar pringo, gital seokako man·gipa NPP-ni sak 26 MLA-rang, Chief Minister-ni noko tom·aniko ong·atangani ja·man Sangma-ko NPP parliamentary party-ni dilgipa songaha.
NPP-ni gital MLA-rang baksa tom·ani ja·man kobor ra·timgipa manderang baksa agangrikengon, NPP-o BJP-ni MLA sakgni aro Baghmara-ni Independent MLA Kartush R Marak-ba bakrimaniko on·enga ine Sangma parakataha.
NPP baksa bakrimenggipa BJP-ni MLA sakgniara Sanbor Shullai aro AL Hek ong·engachim.
United Democratic Party (UDP)-ba uamang baksa bakrimgenma ine sing·on, ua mamingkoba aganna gita jechakskaaha.
Bakrimenggipa dolrang baksa chanchirimani ja·man uamang gital bimingko tik ka·anggen ineba Sangma parakataha.