SHILLONG: Ia chang Meghalaya Assembly election-o Trinamool Congress (TMC), bang·bata constituency-rangon chu·sokna man·jahani gimin National People’s Party (NPP)-ni manderang, songadam nokadamrango manderangna tangka paisarangko sualachisa chena gita man·aha ine Meghalaya TMC-ni dilgipa Mukul Sangma matnangataha.
Iani bidingo kobor ra·timgipa manderang baksa agangrikengon, NPP-ni dilgiparang niam gri tangka paisarangko bang·en chimongaha ong·jaode baoni tangka paisarangko indita man·genchim ine Sangma sing·doataha.
A·dokni dingtang dingtang biaprango aro mongsongbate songadam nokadamrango NPP, manderangna tangka paisarangko sualani a·selsa chegipa ong·aha ine Sangma matnangataha.
NPP aro BJP ong·gijagipa pilak MLA-rangkon apsan bakrimenba, ‘tangka jakkalsretgipa’ sorkariko bon·atchina gitaba ua didiataha.
Meghalaya a·dokko tangka paisa jakkalsretbatsranggipa a·dok ine Union Home Minister Amit Shah-ni agangipa kattarangko janapatengon, iandake a·dokni biming namgijako bon·atanide da·o gital seokako man·gipa MLA-rangni daitoan ong·enga ine TMC-ni dilgipa parakataha.
NPP-ni sorkariko rikna sikkelengani gimin janapatskaengon, ian NPP-ni bilna mikbokrakaniko mesokani ong·enga ine Sangma parakataha.
Ia election-o manderang, darang dolnaba chu·gimik bilko on·jaha ineba ua parakataha.
Ia chang Assembly election-o NPP dam 26 seat-rangko cheahachim aro TMC-de dam 5 seat-rangkosan cheskaaiahachim.
