SHILLONG: Bharatiya Janata Party (BJP)-ni MLA sakgni aro Independent MLA saksa baksa Sukrobar pringo National People’s Party (NPP)-ni sak 26 MLA-rang, gital sorkariko rikna gita a·dokni Governor Phagu Chauhan-ko grongehaoba, Meghalaya Trinamool Congress (TMC), NPP aro BJP dolrangko gale gipin dolrang baksa bakrime sorkariko rikskana jotton ka·enga.
TMC-ni dilgipa aro a·dokni gitcham chief minister Mukul Sangma-ni parakatani gitade, NPP aro BJP-ko gale ua dingtang dingtang dolrang baksa sorkariko rikna gita agangrikenga.
“NPP aro BJP dolrangna agrede chinga pilak political dolrang baksa agangrikenga aro uamang pilakan a·dokni namgnina ku·cholsan ong·na nangniktokenga,” ine Sukrobar salo, TMC-ni dilgipa Mukul Sangma parakataha.
Sangma-ni aganani gitade, Indian National Congress (INC), United Democratic Party (UDP), Hill State People’s Democratic Party (HSPDP), People’s Democratic Front (PDF), Voice of the People’s Party (VPP) aro uandakgipa dolrang baksa sorkariko rikna ua agangrikenga.
Ia chang Assembly election-o NPP dam 26 seat-rangko aro BJP seat damgniko cheahaon, Congress aro TMC dolgnian seat dambongaprakko, UDP dam 11-ko, VPP dambriko, PDF aro HSPDP damgniprakko aro Independent MLA-ba sakgni dongskaachim.
Meghalaya a·dokni dam 60 seat-rang donggipa Assembly-o sorkariko rikna gita komibeoba dam 31 seat-rangko nangenga indiba NPP aro BJP-ko gale, ia pilak dolrang baksana Independent MLA sakgniba bakrimgenchimode dam 31 seat-rang ong·e sorkariko rikskana man·genchim.
“Ia election-o darangba chu·onga gita seat-rangko chejahani gimin chinga dingtang dingtang dolrang baksa chanchirimkuenga,” ine Mukul Sangma aganaha.
Chief minister-ni kamni gimin sing·on, “Da·o dipet chinga a·dokni namgnini giminsa chanchienga. Gitcham sorkarini somoio bang·en tangka paisarangko jakkalsretaha aro da·o iandakgipa obostako manderang nangniktokjaenga. Uni gimin chief minister-ko songani kamde ja·manosa ong·aigen,” ine Sangma parakataha.