SHILLONG: Nangrimgimin jegalgipa dolrangni CM aro gitalgipa Cabinet Minister-rangni ku·mikchetani salo NPP-na chakgipa sakgni HSPDP MLA-rangni kosako jegalna Raj Bhavan-o tom·dakna ka·mik kenataniko man·e District Administration niam aro retiko rakkina pilak chel·chak-champengani cholrangko dakna a·bachengataha.
District SP baksa chanchigrikaha aro uamang niam aro retiko rakkina champengani cholrangko dakna miksonganirang donga East Khasi Hills DC SC Sadhu mijalo aganaha.
“Niam aro retini obostako rakkina chingo chu·onga gita chel·chakgipa dolrang donga aro apsan somaio chinga maming golmalrang ong·jana gita manderangko chel·chakna chinga jotton ka·enga,” ua aganaha.
Raj Bhavan-o napako uamangni garionikon uamangko saldrakgen ine NGO-rang ka·mik kenataha.
Minggipin Prime Minister Narendra Modi aro Union Home Minister Amit Shah gipin dilgiparang baksana re·baenggipa Mongolbar salo ku·mikchetao dongpana gita re·bana ka·dongsoenga.
District Administration, election-rangna watatako man·gipa CAPE-ko dakchakangkuchina mol·molaha aro CAPF-ni ge·sni company-rang re·baenga, ua agandapaha.
