SHILLONG: Conrad Sangma, uni chu·gimik cabinet baksa Chief Minister-na ku·mikchetna am·genchimoba NPP aro BJP-ko gale gipin opposition dolrang bakrime sorkariko rikna miksonganiko chu·sokatna kam ka·skaenga. Uamangna jotton ka·aniko dontongna sikjaenga.
Opposition camp-o Congress, UDP, VPP, TMC, INC aro PDF donga, uamang BJP-NPP-ko gale sorkariko rikna jotton ka·beenga.
‘Conrad Sangma baksa chu·onga gita MLA-rang donga ine a·kangenga indiba HSPDP camp-o jaja-jiji ong·engani gimin chu·onga gita MLA-rang dongja ine TMC State president, Charles Pyngrope aganaha.
Party-ni president, NPP bakrimna chakpae on·gipa chittiko ra·pilaha, HSPDP-ni memborrang dongjaode uamango majority-an dongjawa. Angni u·iani gitade, party-an bakrimna sikjae chakpaaniko ra·galaha aro bebe gita HSPDP-ni memborrang chakangkua ong·ode anti-defection law-o ga·aknaba gnang. Regional dolrang apsan ong·aha, unbaksana independent MLA-ni chakpaanikoba mesokna nanga ine Charles aganaha.
Indake ong·engon PDF -ni President Banteidor Lyngdoh, uamangko NPP sorkario bakrimna okamaha indiba iani gimin agangrika matchotsrangkujaenga ine talataha.
Minggipin Conrad Sangma, mikkangchi bang·bate support-ko man·kugen ine aganahachim aro uamang baksa sak 32 MLA-rang donga ine Conrad a·kangenga.
Uandake UDP-ni a·gipi dilgipa Paul Lyngdoh-ba camp baksa agangrikuenga ine aganataha.
