Shillong: (PTI) NPP-BJP-ni bakrime rikenggipa sorkarina chakpaaniko on·ani gimin HSPDP-ni MLA Methodius Dkhar-ni Shillong-o donggipa office-ko so·chipaha ine NPP-ni a·gipi dilgipa Prestone Tynsong aganaha.
Dkhar, party-ni MLA Shakliar Warjri baksa mni Sukrobar salo NPP-BJP bakrime rikenggipa sorkario bakrimna ku·chakaha. NPP-BJP bakrime rikenggipa sorkariko Conrad K Sangma-ni dilanio rikna a·kangaha.
Gitcham deputy chief minister Tynsong, kobor ra·timgiparang baksa agangrikao, ‘Hill State People’s Democratic Party (HSPDP)-ni supporter-rang party-ni sakgni MLA, NPP-BJP bakrime riknasienggipa sorkario bakrimaniko on·anina ka·onange Laitumkhrah jolo donggipa Dkhar-ni office-ko Sukrobar walo so·chipaha ine parakataha.
“Firefighter-rang a·sel ong·gipa biapona sokange wa·alko kimitaha.”
HSPDP, TMC aro Congress baksa bakrimna tik ka·aha indiba uamangni sakgni MLA-rang NPP-BJP bakrimgipaona re·angskaha.
Jemangan golmal ka·na jotton ka·enga, uamang, manderangni vote on·e seokaniko ra·chakna nanga ine Tynsong aganaha. Aro Hynniewtrep Integrated Territorial Organisation (HITO) aro Hynniewtrep Youth Council (HYC) -ko matnangataha.
“Golmal ka·enggiparang MLA-ni constitutional right-ko ra·sekna jotton ka·enga, uni gimin iandakgipa obosta ong·arangko ra·chakna man·jawa, ian constitutional rights-ni kosako ong·a ine Tynsong aganaha.
HSPDP supporter-rang Sonibar salo Motphran jolo sakgni MLA-rangni bimingako tarie so·e galaha. Jeon HITO aro HYC-ni dilgiparang bak ra·tokaha indake Khasi jatoniko CM-ko seokchina dabienga.
