Shillong: Hynniewtrep-ni manderang, Khasi Chief Minister-chi a·joltangni party-rangchi sorkari rikako nangnikengako Hynniewtrep Youth Council (HYC) parakaha.
“A·jolni party-rangni gisepo on·tisaba ku·cholsan ong·ani dongja. Mikkangchi re·baenggipa bilsi bongaode a·jolrangni party-rang ku·cholsan ong·na chinga kam ka·gen. Indiba da·o a·joltangni party-rangchi sorkariko rikdilangna Khasi CM ong·ako chinga skanggipa nangnikenga,” HYC general secretary, Roy Kupar Synrem, mijalo NPP baksa bakrimna segipa chittiko ra·pilchina HSPDP-ni sakgni MLA-rang-Methodius Dhar aro Shakliar Wajrie-ko agana jinma meeting ka·ani ja·mano kobor ra·timgiparangna aganaha.
Ia changni election-o BJP aro NPP ong·gijagipa party-rangko namniken manderang puone vote-rangko sualaha, Synrem aganaha.
“Batanggimin bilsi bonga bilsirango MDA sorkarini bil-sasonko ka·sretakon nike NPP ong·gijagipa party-rangchi sorkari rikako nangniken manderang uamangni dakna nangani gitan puonaha. Seat-rangko bang·e man·anio NPP Garo Hills-o ge 18 seat-rangko man·aha indiba a·joltangni party-rang Khasi-Jaintia Hills a·joloniko ge 19 seat-rangko man·ahani gimino a·jolni party-rang nangrime sorkariko rikna nangnikenga,” HYC general secretary aganaha.
NPP national vice president, Prestone Tynsong, Khasi-Jaintia Hills a·jolni political dilgipa saksa ong·a, ua (Tynsong) a·jolni party-oni ong·ja ua maikai matnanga gnang aganaha.
Mitam political party-rangoni political agent ong·na nanga ine Tynsong-ni uamangko matnanganina maiko agangen sing·anina, Deputy Chief Minister-ni agangipa kattana uamang indake aganchakna nangjawachim, HYC general secretary aganaha.
“A·gipi political dilgipa saksa ong·e daitoko aro dal·e ra·gijaniko nikaha. Je kattakon Tynsong aganaha uni gimin indake aganchakaniko nikna gita man·gen. Bilsi bonga bilsirang changantian uamang puongiparangko cha·bokna man·enga indakgipa kattako agane ua Khasi jat gimikkon chonnikaha,” Synrem aganaha.
Political dilgipa ong·rongbaenggipa Deputy Chief Minister-ni kosako jeba sin·jetani kattako uamang agana nanggen, ua aganaha.
“Chinga darang party-ni political dol ong·ja. Chinga manderangni aro a·dokni chanchigipa nangnikgipa mamlani bidingo agan-janapgipa sin·jetgipa dolrang ong·a. Aroba da·o chinga a·dokni namgnina ia neng·nikaniko aganenga,” HYC general secretary aganaha.
HSPDP tikkito chebagipa sakgni MLA-rang NPP baksa bakrimna gita re·angaha, NPP baksa bakrimna nangja ine uamang ma·sina nanga, ua aganaha.
Ua sakgni HSPDF MLA-rang jat gimikko aro uamangni constituency-rangni puongiparangko dal·e ra·jaha, ua aganaha.
“Uamangoni sakgnian HSPDP partyko bikongchenggipa aro party-ni gitcham dilgipa Hopingstone Lyngdoh-ni bimingko janape campaign ka·aha. Indiba uamang cheani adita kontarangni ja·manon uamangni ska-namnika gita dakna ame jemangan uamangko seokaha ua manderangko aro party-ni dilgipa sagini bimingko uamang chonnikaha,” Synrem aganaha.
Chief Minister, Conrad K. Sangma-ko matnange, Eight Schedule-o Khasi ku·sikko chapatani aro gipin neng·nikanirangko man·chape ILP ong·chong jeba neng·nikanirangna uamang uko grongon Sangma-ni ramram dake aganchakgipani giminba niangkugen, ua aganaha.
“Donchipenggipa dabianirangko Ma·mongna agana Delhi-ona sak 60 MLA-rangko dilangnagipa dilgipako chinga nanga. ILP-ko on·a aro Khasi ku·sikko jako ra·na Ma·mongko diditaina dabitaiani obosta ong·ode Delhi-ona dabigipa dolrangko rimangna jajaani donggijagipa dilgipako chinga nanga,” HYC general secretary aganaha.
