HSPDP MLA-rangni kosako chakatengani gimin NGO-rangko Conrad jegala

SHILLONG: National People’s Party (NPP)-ni dilanichi sorkariko rikanio bakrimaniko on·enggipa Hill State People’s Democratic Party (HSPDP)-ni MLA sakgnini kosako kragija kamrangko ka·engani gimin NPP-ni national president Conrad K Sangma, dingtang dingtang dolni kamrangko raken jegalataha.
Gital sorkariko rikanio HSPDP-ni MLA sakgni, chong·motan Methodius Dkhar aro Shakliar Warjri-ba NPP baksa bakrimaniko on·ahachim indiba Sukrobar walo, badiaba dolni manderang, Laitumkhrah-o donggipa HSPDP MLA Methodius Dkhar-ni office-ko so·chipe galahachim aro uni ja·man Sonibar salo, dingtangmancha jinma tom·bimonganiko ong·ate, ia MLA sakgnini bimangko tarienba so·e galtokahachim.
Iandake a·doko songdongenggipa manderangni jakchi seoka man·gipa MLA-rangni kosako kragija dakaniko jegalatengon, “Meghalaya a·doko changsaba iandakgipa obostako chagronga dongkujachim aro iandakgipa kamko a·dokni manderang ra·chakna man·jawa,” ine Sangma parakataha.
Meghalaya a·dokni manderang pangnan a·songni niamko ja·rikgipasa ong·achim ine janapatengon, ia election-oba manderangsa an·tangtangni namnikani gita dilgiparangko seoke watataha aro manderangni seokaniko pangnan mande ra·na nanga ine Sangma didiataha.
MLA-rangko constituency-tangtangni manderangsa seokahani gimin sorkariko rikanio bakrimanide MLA-rangni aro manderangni skaniosa ong·aia ineba NPP-ni national president parakataha.
“MLA-rangko constituency-tangtangni manderangsa seokahani gimin ian manderangni nangnikaniko mesokanisa ong·a aro sorkariko rikanio badia dolna chakpaaniko on·gen uade MLA-rangni aro manderangni skani gitasa ong·aigen,” ine ua aganaha.
Sorkariko rikna gita NPP baksa bakrimanio jak dongja ine HSPDP-ni seatgipa chittini gimin janapatskaengon, sorkariko rikanio NPP baksa HSPDP-ni legislature party-sa bakrimenga aro HSPDP-ni MLA sakgnian, NPP-na chakpaaniko on·e Sukrobar attamo soi ka·aha ine Sangma parakataha.
Gital sorkari, re·baenggipa March-ni 7 tariko, Governor-ni noko ku·mikchetgen aro ku·mikchetanio a·songni Prime Minister Narendra Modi baksana Union Home Minister Amit Shah-ba dongpagen ineba Sangma parakataha.
NPP-ni sak 26 MLA-rang baksana BJP-ni sak 2, HSPDP-ni sak 2 aro Independent MLA sakgniko man·chape gimik sak 32 MLA-rang, gital sorkariko rikenga ineba NPP-ni national president parakataha.