TURA: Adita salrangna skang matchotanggipa Meghalaya Assembly election-o National People’s Party (NPP)-ni dilgiparang, Bharatiya Janata Party (BJP)-ko Kristianrangni aro Tribal-rangni kosako chakatgipa dol ine manderangna tol·e on·ahani a·selsa election-o amako man·rikaha ine Robibar salo, Tura-ni MDC aro South Tura constituency-o BJP-ni candidate ong·e susaanggipa Bernard N Marak parakatenba, da·o sorkariko rikna ja·ku de·anio NPP baksa bakrimaniko on·na sikkelahani gimin Meghalaya a·dokni BJP-ko sing·doataha.
Marak-ni parakatani gitade, Assembly election-na campaign ka·ani somoirango NPP-ni dilgiparang, BJP-ko Kristianrangni aro Tribal-rangni kosako chakatgipa dol ine tol·e sakki on·ahani a·selsa bang·bata constituency-rangon BJP amako man·rikahachim.
Gital sorkarini ku·mikchetaniona a·songni Prime Minister Narendra Modi aro Union Home Minister Amit Shah-ko okamatengani gimin NPP-ni national president Conrad K Sangma-ko sing·doatengon, “Batanggimin bilsi bongani gisepo aro election-ni somoioba NPP-ni a·sel BJP-na kam ka·enggipa manderang bang·en neng·nikanirangko chagrongna nangaha aro iako PM Modi aro Amit Shah ma·sichongmotengggen. BJP-ko Kristianrangni kosako chakatgipa aro jat basegipa dol ine manderangna tol·e on·ani ja·manoba da·o uamangni ku·mikchetaniona Prime Minister Narendra Modi aro Union Home Minister Amit Shah-ko okamnkuenga. Indita cha·bokako man·ani ja·mano uamang maikai NPP sorkarini ku·mikchetanio bak ra·ekuna man·gen,” ine Marak sing·doataha.
Adita salrangna skang matchotanggipa Assembly election-o BJP-ni candidate Bernard Marak, 8236 vote-rangko aro NPP-ni Conrad K Sangma, 13,342 vote-rangko man·e South Tura constituency-o chegipa ong·ahachim ine nikna man·a.
Prime Minister Narendra Modi aro Union Home Minister Amit Shah-ko gital sorkarini ku·mikchetaniona okamatengani gimin NPP-ko sing·doatengon, BJP-ni dilgiparangko Kristianrangni kosako chakatgipa ine tol·e on·ahani gimin aro BJP-na kam ka·enggipa manderangko kal·ake rona jotton ka·ahani gimin NPP-ni dilgiparang kema bi·chengna gita nanga ine Marak parakataha.
“BJP sorkariko rikgenchimode manderangni bebera·ani aro Tribal-rangni bilrang gimagnok ine manderangko tol·ani ja·manoba maini gimin NPP, BJP baksa sorkariko rikna nangnikkuenga, iako manderangna talate on·chengna nanga. BJP maming dakeba Kristianrangni aro Tribal-rangni kosako chakatgipa dol ong·jachim indiba NPP-ni dilgiparang, manderangna tol·e on·aha. Election-ni result-rangko parakani saloba NPP-ni manderang, BJP-na kam ka·giparangko chonnike, BJP-ni nokdangrangko bomarangchi godapaha aro chingo sakkirangba donga,” ine Marak parakataha.
