SHILLONG: Meghalaya a·dokni All India Trinamool Congress (AITC) aro Congress dolrang, a·joltangni dingtang dingtang dolrang baksa bakrime, National People’s Party (NPP)-ni sorkari rikaniko champengna jotton ka·ahaoba, Robibar salo United Democratic Party (UDP) aro People’s Democratic Front (PDF) dolrang, NPP-chi dilenggipa sorkario bakrimeahani gimin AITC-ni dingtang sorkari rikna miksonganiko bon·atskaaha.
Iana skang, NPP-ni sak 26 MLA-rang, BJP-ni MLA sakgni, HSPDP-ni MLA sakgni aro Independent MLA sakgni baksa bakrime gimik sak 32 MLA-rang sorkariko rikna tariahachim indiba da·o UDP-ni sak 11 aro PDF-ni MLA sakgniba NPP-chi dilenggipa sorkario bakrimeahani gimin NPP-chi dilenggipa sorkario gimik sak 45 MLA-rang gapskaaha.
NPP-chi dilenggipa sorkario da·o BJP, HSPDP, UDP, PDF aro Independent MLA-rangba bakrimtokahani gimin Opposition-o AITC-ni sak 5, Congress-ni sak 5 aro Voice of the People’s Party (VPP)-ni sak 4 gimik sak 14 MLA-rangsan dongrikaiaha.
A·dokni Chief Minister Conrad K Sangma aro uni Cabinet minister-rang, Mongolbar salo, Shillong songjinmani Raj Bhawan-o ku·mikchetaniko dakanggen aro gital minister-rangni ku·mikchetanio a·songni Prime Minister Narendra Modi baksana Union Home Minister Amit Shah-ba re·bae bakko ra·angna sienga.
Koborko man·soani gitade, BJP-ni MLA sakgninan Cabinet-o biapko on·china dabiahachim indiba da·o UDP aro PDF-ni MLA-rangba NPP-chi dilenggipa sorkario bakrimeahani gimin BJP-na Cabinet-ni biap damsakosan on·aignok.
