SHILLONG: Meghalaya a·doko sorkariko rikna gita Trinamool Congress (TMC)-o chu·onga gita dilgiparangko man·jahani gimin opposition dol ong·e a·dokni namgnina kamko ka·angskagen ine Sombar salo, Songsak-ni TMC MLA Mukul Sangma parakataha.
Iani bidingo kobor ra·timgiparangna talataniko on·angengon, seokako man·gipa dilgipa sakantian aro political dolantian, manderangni namgnina aro a·dokni namgnina dingtang dingtang daitorang donga ine Sangma parakataha.
Political dolantian a·dokni dilgiparangko rimchimonge dilgiparangko bariatna jotton ka·ronga ineba ua aganaha.
“Politics-o an·ching skangonin iandakgipa kamko nikna man·enga indiba seokako man·gipa dilgiparangni kamara manderangni namgnina kamko ka·anian ong·ani gimin pangnan an·tangtangni daitorangko ma·sigipa ong·na nanga,” ine Sangma aganaha.
TMC MLA-ni aganani gitade, badiaba badiaba kamrango political dolrangkoba nanga aro uamangan a·songni namgnina kamrangko ka·gipaba ong·a.
