SHILLONG: Nangrime riktainasienggipa NPP-ni re·dilgipa MDA 2.0 sorkarina chakpaaniko on·anio cabinet berth-ko bi·ani ba am·ani gimin maming party-ni gita maming janapani dongja ine People’s Democratic Front (PDF)-ni working president, Banteidor Lyngdoh mijalo aganaha.
“Anga an·tangan Chief Minister-na mingsogimin Conrad K. Sangmana aganaha je, ia changode anga Cabinet Minister ong·na skani dongja. Bebegita cabinet-ko on·genchimoba da·ode anga jechakaigen” ine Lyngdoh aganaha jean gitcham sorkario Sports aro Youth Affairs minister ong·achim, indake PDF-na cabinet-ko tikatjani gimin uni chanchiani gimin sing·ahachim.
NPP-ni re·dilnagipa sorkarina chakpaaniko parakeanio, ua cabinet-o maming biapkoba bi·ejaha, uko Chief Minister ong·nagipa ma·sia ineba ua aganaha.
Indake ong·engon, uni party president aro Sohra MLA, Gavin Miguel Mylliem-na Minister ong·na on·ode namen kusi ong·begenchim ineba PDF working president aganaha.
“Indiba chinga ianon chadenga je chinga party-ni gita maming cabinet berth-ko bi·ade dongja,” Lyngdoh aganaha, jean Mawkynrew constituency-oni seokatako man·ahachim.
Unomitingo, uamangna mamingkoba u·iatgija sorkari rikanio chakpaaniko on·na gita UDP, uamangna skang re·angaha ine ma·siani ja·man, uni party-ba sorkarina chakpaaniko on·na re·angaha ineba PDF dilgipa aganaha.
Sombar salo, gital Chief Minister Conrad Sangma-ni kobor ra·timgiparangna parakatani gitade, Cabinet-o donggipa ge 12 cabinet berth-rangoniko ge·chetko NPP, ge·gniko UDP, BJP aro HSPDP-na ge·prakko on·enga aro ia minister-rangba apsan da·al Mongolbar salni bakon ku·mikchetanggen.
