SHILLONG: TMC aro Congress dolrang baksana a·joltangni political dolrang baksa sorkariko rikna tariani ja·man, National People’s Party (NPP)-chi dilenggipa sorkario bakrimanganiara United Democratic Party (UDP)-ni ‘tamasa’ dake mesokanisa ong·aia ine matnanganiko Sombar salo, UDP-ni president Metbah Lyngdoh jegalatenba, TMC aro Congress dolrang baksa bakrimani ja·manoba a·joltangni political dolrango MLA-rang chu·ongjahani giminsa uamang NPP-chi dilenggipa sorkario bakrimna draatako man·aha ine parakataha.
“Chinga iano manderangko cha·bokna ‘tamasa dakna’ re·baa ong·ja aro mikkangchiba anga mamingba dakeba manderangko togijawa,” ine VPP-ni president Ardent Miller Basaiawmoit-ni matnanganirangna UDP-ni president aganchakaniko on·ataha.
A·joltangni political dolrangchin uamangni dolba sorkari rikatna jotton ka·ahachim indiba MLA-rang chu·onga gita dongjahani a·sel kamrang chu·sokgipa ong·na man·jaha ineba ua aganaha.
“Sorkariko rikna tariani bidingo nipitaina chinga gnigipa tom·aniko ong·atna miksongachim indiba ua somoion HSPDP-ni MLA sakgni aro Independent MLA saksako man·chape gimik sakgittam MLA-rang gimaahani a·sel tom·aniko ong·atna man·jaha,” ine Lyngdoh aganaha.
Wate katanggipa MLA sakgnide re·bapilgen ine political dolrangoni dolsani dilgipa uamangna aganahachim ine janapatengon, ua sakgni MLA-rangba re·bapiljahani a·sel uamango sak 27 MLA-rangsan dongaiaha aro sak 27 MLA-rangchi maikai sorkariko rikna a·kangena man·gen ine UDP-ni president sing·doataha.
Khasi aro Jaintia Hills-ni manderang, UDP-kon sorkariko dilchina nangnikahani gimin result-ko parakatani salon uamang iako dakna jotton ka·ahachim indiba uamango chu·onga gita MLA-rang dongjani a·sel iako chu·sokatna man·jaha ineba Lyngdoh parakataha.
“Chingo chu·onga gita membor-rang dongja ine nikani ja·man chinga NPP-chi dile sorkariko rikenggipa dolo bakrimna tik ka·aha,” ine Lyngdoh aganaha.
Deputy CM-ni kamko UDP dabia dongja ine janapatengon, sorkariko bakrime rikenga ong·ode dolsa dolgipinni gisepo ma·sichakgrikani dongna nangaia ine UDP-ni president parakataha.