TURA: Mongolbar salo, West Garo Hills a·jani Gambegre block ning·o donggipa Darengre PHC-o World Tuberculosis Day-ko maniangaha.
Ia program-ko ong·atanio Gambegre C&RD Block-ni Horticulture Development Officer Flamia Chimachi R Marak, jinmana aganprakangengon, 2025 bilsini gisepon India sorkari, TB saaniko bon·atsrangna gita jotton ka·enga ine TB sagipa manderang pilakkon sorkari baksa bakrime, sanna bananirangko ra·china didiangaha. Sabisini giproroaniko champengna gita TB sabisini chin donggipa manderang pilakkon, sepangbatgipa hospital-ona re·ange sanna bananirangko ra·china gitaba Marak didiangaha.
Ia tom·anio West Garo Hills a·jani District Tuberculosis Officer Dr EA Sangma-ba dongpae, jinmana aganprakangengon, 2025 bilsini gisepon India sorkari, TB sabisiko bon·atna miksonge ia program-ko a·bachengataha aro TB sabisiko bon·atna gita sabisi man·gipa manderangna indin sanna bananirangkoba on·enga ine parakataha.
Ia tom·anio National Tuberculosis Elimination Program Nutritional Support-ni bak gita dingtangmancha TB saenggipa manderangna cha·anirangkoba suale on·angjolaha.
Ia program-ko ong·atanio dongpae bakko ra·anggipa gipin manderangara, Tura DR-TB Centre-ni Senior Medical & Health Officer Dr KA Sangma aro gipinrang ong·a.
