Niam gri koela badinganiko MDA 2.0 sorkari bon·atgen ine Conrad ku·rachaka

SHILLONG: Meghalaya a·doko niam gri koela bikotani aro salruraanirang dongjana gita MDA 2.0 sorkari kamrangko ka·gen ine Mongolbar salo, gnigipa changna Meghalaya a·dokni Chief Minister ong·e ku·mikchetangani ja·man National People’s Party (NPP)-ni national president Conrad K Sangma parakataha.
A·doko niam gri koelarangko bikotna aro salrurana on·ahani gimin NPP-chi dilanggipa gitcham MDA sorkariko dingtang dingtang dolrang matnangtokahani gimin Chief Minister, ia kattarangko gital dake aganskaaha.
“Batanggimin somoirango agangimin gitan chinga da·o mikkangchiba niam gri koela badinganiko champengna ja·kurangko de·anggen,” ine Sangma aganaha.
A·doko niam gita koela bikotaniko a·bachengna kamrangko ka·engaha ine janapatskaengon, dolbrimangni gitade koelarangko bikotna, pilak nanga lekkarangko tarimanaha aro adita jarangni gisepon uamangni mining plan-rangko tarie a·doko niam gita koela bikotaniko a·bachenggnok ine Chief Minister parakataha.
Assam a·dok baksa meligrikna man·jaenggipa simarangni gimin janapatskaengon, meligrikna man·jaenggipa bangki damdok biaprangni giminba bakan a·dok damgnini gisepo agangriktaina a·bachenggnok ine Sangma parakataha.
MDA 2.0 sorkario Deputy Chief Minister sakgni, chong·motan Prestone Tynsong aro Sniawbhalang Dhar-ko donahani gimin sing·on, batanggimin somoirangoba Deputy CM sakgniko donna nangani ong·achim aro iako dakanichi dingtang dingtang biaprangoni dilgiparangnaba biapko on·na man·a ine Chief Minister parakataha.
Nangrimgimin dolrangchi sorkariko rikaniara altua ong·ja ine janapatengon, dingtang dingtang neng·nikanirang sokbagenchimoba uamang, dolsa dolgipin baksa agangrikanichi iandakgipa neng·nikanirangko namatna jotton ka·gen ine Sangma parakataha.
MDA 2.0 sorkarini mongsonggipa daitorangni bidingo janapatengon, nambata sanna bananiko, nambata lekka poraniko aro mongsongbate chadamberangni dingtang dingtang nanganirang, jekai, kam ka·e cha·ani cholrang aro uandakgipa kamrangna gisik on·bate kamko ka·anggen ine Chief Minister parakataha.