SHILLONG: National People’s Party (NPP)-ni MLA aro MDA-ni biming mingenggipa Thomas A Sangma, maming jegalani grian Meghalaya Legislative Assembly-ni gita Speaker-na seokako man·nasiengaha.
Sangma-ko MDA 2.0 sorkari, Assembly Speaker-na biming mingahachim aro ua Speaker-ni kamna susana gita Mongolbar salo, Assembly-ni Commissioner & Secretary Andrew Simons-ni mikkango nomination-ko file ka·angaha.
Uni nomination file ka·angani somoio NPP-ni gipin MLA-rangba Thomas Sangma baksa dongpaahachim.
Speaker-ni kamna ong·atna sienggipa election-ni bidingo kobor ra·timgipa manderang baksa agangrikengon, uko maming susaani grian Assembly-ni gital Speaker seokgen ine Sangma, an·tangni ka·dongchakenganiko parakataha.
Assembly Speaker-ni kamna election-ko March 9 tariko ong·atengachim.
Batanggimin bilsi bongana NPP-ni dilanichi MDA sorkariko chalaianio, Speaker-ni kamko UDP-ni president Metbah Lyngdoh ra·skaahachim aro Thomas Sangma, Chief Minister-ni Adviser ong·e kamko ka·skaahachim.
