SHILLONG: Bristibar salo a·dokni Chief Minister Conrad K Sangma, Cabinet Affairs, Finance, Forest & Environment, Home (Political), Planning, Mining & Geology, Election, Personnel & AR, Program Implementation & Evaluation, Information Technology & Communication aro gipin minister-rangna on·gijagipa portfolio-rangko an·tangna ra·rike, gipin department-rangko gital Cabinet minister-rangna suale on·angaha.
Chief Minister Conrad K Sangma-chi dilenggipa MDA 2.0 Cabinet-o minister-rang NPP-oni sak 8, UDP-oni sak 2, BJP-oni saksa aro HSPDP-oni saksa dongachim ine nikna man·a.
Indake ong·engon, Deputy Chief Minister Prestone Tynsong-na ia chango Home (Police), PWD (Roads & Building), District Council Affairs aro Parliamentary Affairs department-ko on·e, sakgipin Deputy Chief Minister Sniawbhalang Dhar-na Urban Affairs, Transport, Commerce & Industries, Prisons & Correctional Services department-rangko on·skaaha.
BJP-ni AL Hek-na ia chango, Animal Husbandry & Veterinary, Fisheries, Printing & Stationery aro Secretariat Administration department-rangko on·e, NPP-ni Ampareen Lyngdoh-na Health & Family Welfare, Law, Information & Public Relations aro Agriculture & Farmers Welfare department-rangko on·skaaha.
UDP-ni Paul Lyngdoh-naba Social Welfare, Tourism, Arts & Culture aro Textiles department-rangko on·e, NPP-ni Comingone Ymbon-na Food Civil Supplies & Consumer Affairs, Water Resources, Home (Civil Defence & Home Guards) aro Cooperation department-rangko tikatskaaha.
NPP-ni sakgipin AT Mondal-na Power, C&RD aro Taxation department-rangko on·aha aro NPP-ni Kyrmen Shylla-naba Excise, Revenue & Disaster Management, Legal Metrology aro Home (Passport) department-rangko on·skaaha.
Williamnagar-ni NPP MLA Marcuise N Marak-na ia chango PHE, Housing aro Soil & Water Conservation department-rangko on·aha aro Rongara-Siju-ni NPP MLA Rakkam A Sangma-na Education, General Administration Department aro Border Areas Development department-ko on·skaaha.
Cabinet-o dambebatsranggipa HSPDP-ni Shakliar Warjri-na Sports & Youth Affairs, Labour aro Registration & Stamps department-rangko pakwate on·angskaaha.
