SHILLONG: Leader of Opposition (LO) ba Opposition dolko dilgipani bidingo ua ainni gimin u·i-ma·sigipa manderang baksa agangrikengkua ine Bristibar salo, Meghalaya Legislative Assembly-ni gital Speaker Thomas A Sangma parakataha.
Ia chang Assembly election-o Congress seat dam 5, TMC-ba dam 5 aro VPP seat dam 4-kosan cheaiahani gimin ia dolgittamonin Opposition dolni dilgipako a·kangna bil dongkujaengachim.
VPP-ni president Ardent Miller Basaiawmoit-de Congress aro TMC dolrang baksa opposition-na bakrimjawa aro doltangari kamko ka·aigen ine parakatmanahachim.
“Iani bidingo anga, ainni gimin u·i-ma·sigipa manderangni ku·pattianiko bi·ataha. Uamang baksa agangrikmanahaosa anga an·tangni chanchianiko parakatgen,” ine Sangma, kobor ra·timgiparangna aganaha.
Da·o dipet opposition bench-oni aro dolgittamonin darangba unbaksa agangrikea dongkuja ineba ua aganaha.
Opposition dolko dilgipa dongjagenchimode opposition dolan dongjawa ineba gital Speaker parakataha.
“Opposition dolo komibeoba sak 10 MLA-rang dongna nanga, uni gimin ia dolgittam bakrime opposition dolko rikjagenchimode opposition dol dongna man·jawa,” ine Sangma aganaha.
