TURA: Adita salrangna skang ong·atanggipa Meghalaya Legislative Assembly election-o 50 percent-na baten me·chikrang, static surveillance team, flying squad aro uandakgipa dingtang dingtang gadangrango dangdike on·aha ine Sukrobar salo, West Garo Hills a·jani Deputy Commissioner Swapnil Tembe, mittelpile aganangaha.
Sukrobar salo, International Women’s Day-ko Tura-ni District Auditorium-o maniani somoio Tembe, ia kattarangko aganaha.
Ia salko manianio Rural Development-ni gitcham Secretary aro Director IR Sangma, District Social Welfare Officer Hemaritha Sangma, Mothers Union-ni secretary Sume Chandola B Sangma aro gipinrangba dongpae bak ra·angtokaha.
Assembly election-ni somoio bang·a me·chikrangan dingtang dingtang gadangrango dangdike on·aha ine an·tangni mittelpilaniko parakatengon, ia sal somoirango pilak kamrangon me·chikrangni bak ra·aniko nikna man·engaha ine West Garo Hills-ni DC parakataha.
NRLM scheme-ni ning·o self help group (SHG)-rangni kam 90 percent-ni gita chu·sokgipa ong·engaha ine janapatengon, me·chikrangni namgnina sorkari, dingtang dingtang scheme-rang, jekai women scholarship scheme, an·seng baljokani scheme aro uandakgipa scheme-rangko ra·gate on·enga ine Tembe parakangaha.
Ia me·chikrangni salko manianio, bading chiwalanio chu·sokgipa saksku me·chikrangna dingtangmancha mittelpilani certificate-rangkoba on·angaha aro uamangara, Esmeralda S Marak, Rupatchi Cheran, Semada Marak, Laura Momin aro gipinrang ong·a.
Assembly election-o 50%-na baten me·chikrang dangdike on·aha ine WGH DC mittelpila
Date:
Share post:
