SHILLONG: Meghalaya a·doko Inner Line Permit (ILP)-ko ra·gate on·china aro Khasi, Garo ku·sikrangko Constitution-ni Eighth Schedule-o chapatchina dabianiko chu·sokatanio Bharatiya Janata Party (BJP)-de bang·e kam dongja aro ian sorkariko dilenggipa dolni daitosa ong·a ine Sukrobar salo, BJP-ni dilgipa aro Cabinet Minister AL Hek parakataha.
“Sorkariko dilna gita chingna chu·onge bilrangko on·jaha indiba chinga sorkariko dilenga ong·ode ia kamrangni bidingo chinga ma·mong sorkari baksa agangrikgenchim,” ine Hek, kobor ra·timgiparangna aganaha.
Sorkariko dilenggipa dolsa, ia kamrangko chu·sokatani giminde chanchie ja·kuko de·gen ineba ua aganaha.
“Sorkariko dilenggipa dol jeko ja·ku de·dila chingaba bakrimanikode on·aigen indiba iana agrede anga mamingoba aganna man·jawa,” ine Hek aganaha.
BJP-ni election manifesto-o je kamrangkon manderangna mesoke on·ahachim, uandakgipa kamrangoni mitamko sorkario ra·napchina gita BJP, NPP-ko mol·molgen ineba Pynthorumkhrah constituency-ni BJP MLA parakataha.
“NPP-chi dilenggipa sorkario chingade chonbegipa baksan ong·aia indiba chinga dilenggipa party-ko mol·molnade man·gen,” ine ua aganaha.
Indake ong·engon, Cabinet-ni berth-ko BJP-ni sakgipin MLA Sanbor Shullai baksa sualgrikani bidingo Chief Minister Conrad K Sangma-ni mikkango agangrikade dongjachim ineba Hek parakataha.
Hek-ni aganani gitade, Cabinet-ni berth-ko sualgrikani bidingo BJP-ni dilgiparang BJP office-osa chanchirimahachim.
“Chingna tikatgimin Cabinet-ni biap damsako anga, BJP-ni sakgipin MLA Shullai baksa sualgrikgen aro jekon party-ni high command aro ma·mongni dilgiparang tik ka·achim, ukode chinga ja·rikna nangaigen,” ine Hek parakataha.
Kamrangko chu·sokatanide sorkariko dilgipani daitosa ine Hek a·kanga
Date:
Share post:
