SHILLONG: Skigiparangni neng·nikanirangko namatani aro mongsongbate skigiparangni dormahani bidingo man·enggipa neng·nikanirangko namatanian uni mongsonggipa daito ong·gen ine Sukrobar salo, a·dokni gital Education Minister Rakkam A Sangma parakataha.
“Skigiparangni neng·nikanirangko namatna gita anga dingtangmancha an·tangko on·kangaha aro iano angna dakchakanirangko on·china anga Chief Minister Conrad K Sangma baksa golpgrikmanaha. Skigiparangna dormahani bidingo neng·nikanirangko namatanian mongsonggipa ong·enga,” ine Sangma, kobor ra·timgiparangna aganaha.
Education department-ko mangrakbatatna gita nangenga ineba Education Minister aganaha.
“Skigipani depante ong·e anga Education department-ni ning·o ong·enggipa neng·nikanirangko ma·sichaka indiba anga pilak neng·nikanirangkode namatna man·janaba gnang,” ine Sangma aganaha.
A·doko lekka porani gadangko dingtangatna gita Education officer-rang bang·en donga ineba ua an·tangni ka·dongchakenganiko parakataha.
Education Minister-ni parakatani gitade, private skulrango skigiparang dormaharangko komibate man·genchimoba nambata result-rangko man·e on·skana man·enga.
“Uni gimin a·doko lekka porani gadangko dingtangatna gita anga MLA-rang, skigiparang, NGO-rang, chatro chatrirang aro a·doko songdongenggipa sakantini bakrimaniko nanggen,” ine Sangma aganaha.
