TURA: North Eastern Hill University (NEHU) Tura Campus-ni skigipa Dr Crystal Cornelious D Marak-ko Meghalaya a·dokni pal, New Delhi-ni Sahitya Akademi-o gital dake songpiltaigipa General Council-ni membor-na nominate ka·aha ine kobor on·aha.
New Delhi Sahitya Akademi-ni General Council membor-na nominate ka·ako man·gipa Dr Marak, NEHU Tura Campus-ni ning·o donggipa Garo Department-o Assistant Professor-ni kamko ka·enga aro uko membor ong·na nominate ka·enggipa General Council-ara, 2023 bilsini January 1 tarikoni a·bachenge 2027 bilsini December 31 tarikona bilsi bongana ong·gen.
New Delhi Sahitya Akademi-ni General Council membor-na nominate ka·ako man·gipa Dr Crystal Cornelious D Marak, ki·tap kinggniko chapa ka·aha aro dingtang dingtang ki·taprangnaba dingtang dingtang seanirangko on·gilaha. Uni segipa ‘Sing·kam’ golpona ua 2012 bilsio State Literary Award-koba man·aha.
Dr Marak, novel-rangna agreba, peodo, drama aro pagitcham ma·gitchamrangni golporangkoba sena namnikgipa mande ong·a aro ua dingtang dingtang dolrang, jekai A·chik Literature Society, Garo Graduates Union aro uandakgipa dolrangoba kamko ka·e songsalna dangdike on·enggipaba ong·a.
2014 bilsionin ua, A·chik Literature Society-ni secretary ong·e kamko ka·enga aro uamangni dilanichi A·chik Literature Society, dingtang dingang seminar-rangko traditional musical instruments-ni bidingo workshop-rangko, Writers Meet, Poets Meet aro uandakgipa program-rangko ong·atrongenga.
NEHU-ni skigipako Sahitya Akademi-ni General Council membor-na minga
Date:
Share post:
